баспаға шығарыў
Бүгин Пакистан Республикасының «AKD Group», «Tahir Asad Industries» ҳəм «Farm Dynamics Pakistan» компаниялары делегациясы аўыл хожалығы тараўында инвестициялық орталықты жетилистириў мақсетинде, Қанлыкɵл районында болды.
Дəслеп, делегатлар Қанлыкɵл районы ҳəкимлигинде, район ҳəкими Абу-Бакир Ибрагимов пенен ушырасты. Онда районның инвестициялық потенциалы, əсиресе, аўыл хожалығы тараўында заманагɵй технологияларды қолланыўдың абзаллықлары, аймақта инвестициялық орталықты қəлиплестириўде ɵндиристиң қандай методларын қоллаў зəрүрлиги ҳаққында ɵз-ара сəўбетлесиўлер алып барып, бирлемши келисиўлерге ерисилди. Усы шеңберде, инвесторлар жердиң ɵнимдарлығын үйренип болғаннан соң, эксперимент сыпатында аймақта Пакистанда жетистирилетуғын картошка ҳəм «басмати» сортлы гүришти жетистириў тилегинде екенлигин билдирди.
Буннан соң,
инвесторлар «Қанлыкɵл» аўыл пуқаралар жыйынында болып, аймақтағы алдыңғы фермер
хожалықларының ɵним жетистириўдеги агротехнологиялары ҳəм имканиятлары менен
жақыннан танысты. Өз-ара алып барылған пикирлесиўлер тийкарында, инвесторлар
алдағы ўақытларда районда кɵлемли жумыслар алып барыў мүмкиншилиги жоқары
екенлигин айрықша атап ɵтти.
Қанлыкɵл районы
ҳəкимлиги Мəлимлеме хызмети