Qaraqalpaqstan Respublikası Ministrler Keńesi

Tórt wálayattan kelgen qánigeler Nókistegi mámleketlik tilde jumıs júritiwge qánigelesken bólim jumısın úyrendi 

Húkimetlik qarar tiykarında Mámleketlik tilde is júritiw tiykarların oqıtıw hám bilimlerdi jetilistiriw orayı shólkemlestirilgen edi. Házirde Qaraqalpaqstan Respublikası hám wálayatlarda bul oraydıń aymaqlıq bólimleri jumıs alıp barmaqta.

25-26 iyun kúnleri oraydıń Nawayı, Jizzax, Surxandárya, Sirdárya wálayatlarınıń aymaqlıq bólim baslıqları Nókistegi mámleketlik tilde is júritiwge qánigelesken bólimniń jumısı menen tanıstı.

Miynmanlar dáslep Nókistegi seminarda qatnastı. Bul jerde jámi 6 modul tiykarında seminar shólkemlestirilgen. Bul bólimde ministrlik, mákeme, húkimet hám xojalıq birlespeleri xızmetkerlerine shártnama tiykarında ózbek hám qaraqalpaq kórkem ádebiyatına baylanıslı til normaları, latın jazıwına tiykarlanǵan ózbek hám qaraqalpaq álippesi hám orfografiyası, mámleketlik tilde is júritiw tiykarları pánleri boyınsha seminarlar alıp barılmaqta.

Bunnan soń miymanlar tájiriybe almasıw maqsetinde nókisli kásiplesleri menen pikirlesti. Onda Qaraqalpaqstan Respublikası Ministrler Keńesi Baslıǵınıń mámleketlik til máseleleri boyınsha máslahátshisi Perdeǵalıy Dabilov hám Bólim baslıǵı Farhod Babajonov qatnastı. Ushırasıwda mámleketlik til, latın jazıwına tiykarlanǵan ózbek hám qaraqalpaq álippesin mámleketlik shólkemler isleytuǵın xızmetkerlerge operativ túrde úyretiw boyınsha pikir almasıldı.

Sonday-aq, kúnniń ekinshi yarımında bólimniń may ayındaǵı pitkeriwshilerine sertifikat tapsırıw máresimi bolıp ótti. 

 Úlgili iskerligi ushın Mámleketlik tilde jumıs júritiw tiykarların oqıtıw hám bilimlerin jetilistiriw orayı Qaraqalpaqstan Respublikası aymaqlıq bólimi baslıǵı Farhod Babajonov Ministrler Keńesi tárepinen arnawlı alǵısnama menen sıylıqlandı.