Qaraqalpaqstan Respublikası Ministrler Keńesi

Prezidentimiz Xorezm wálayatına bolǵan saparında Ámiwdáryanıń ústinen Xorezm hám Qaraqalpaqstandı baylanıstırıw ushın 413 metrli kópir, sonıń menen birge Qaraózek rayonınan Xorezm wálayatınıń Shovot rayonına shekem 79 kilometrli temir jol qurılatuǵının atap ótken edi. 

Kóp uzamay bul qurılıs baslap jiberildi. Qaraqalpaqstan Respublikası hám Xorezm wálayatın baylanıstırıwshı qos kópirdiń qazıǵın qaǵıw máresimine  Ózbekstan Respublikası Bas Ministriniń birinshi orınbasarı A.Ramatov, Xorezm wálayatı hákimi F.Ermanov, Qaraqalpaqstan Respublikası Joqarǵı Keńesi Baslıǵı M.Kamalov, Qaraqalpaqstan Respublikası Ministrler Keńesi Baslıǵı Q.Sariev hám bir qansha nuraniyler qatnastı.

 Dáslep baslanıp atırǵan qurılıstıń sátli bolıwı hám xalqımızdıń amanlıǵı ushın qan shıǵarılıp quran oqıldı. 

Jańa kópirdiń qazıǵın qaǵıwdı Qaraqalaqstan Respublikası Joqarǵı Keńesi Baslıǵı M.Kamalov baslap berdi.

Maǵlıwmat ornında atap ótiw orınlı,  bul kópir Ámiwdárya rayonına 1980-jılı ornatılǵan  panton kópirdiń janınan qurıladı.

Uzınlıǵı 413 metrge teń bolatuǵın jańa kópir arqalı hám avtomobil jolı, hám temir jol ótiwi jobalastırılǵan.

«Jańadan qurılatuǵın kópir hám sol kópirge shekemgi bolǵan 10 kilometrge shamalas temir jol, kópirden keyingi 60 kilometrden aslam bolǵan temir jol qurılǵannan soń aldınǵı 240 kilometr artıqsha háreketleniwdiń aldı alınadı. Avtomobil hám temir jol jónelisinde tasılıp atırǵan júklerdiń mánzilge jetip barıw waqtı 6 saatqa qısqaradı.

Sonday-aq, bul kópir arqalı ótip atırǵan júklerdiń jıllıq nátiyjeliligi 150 milliard sumǵa shamalas boladı – sonsha qárejetlerdiń únemleniwi kútilmekte. Xorezm wálayatı hám Qaraqalpaqstan Respublikası arasındaǵı temir jol arqalı tasılıp atırǵan júklerdiń ortasha kólemi 12 million tonnanı qurap atırǵan bolsa, kópir jáne temir jol qurılǵannan keyin júkler kólemi joybardıń ózin aqlaw múddetine jetip barǵanǵa shekem 20-25 million tonna dógereginde boladı.

QR Ministrler Keńesi Málimleme xızmeti