Ózbekstan Respublikası Prezidentiniń 2016-jıl 28-dekabrdegi «Fizikalıq hám yuridikalıq shaxslardıń múrájaatları menen islesiw sistemasın túpten jetilistiriwge tiyisli is-ilajlar haqqında»ǵı
PF-4904-sanlı Pármanı menen Ózbekstan Respublikası Prezidentiniń Xalıq qabıllawxanası shólkemlestirilip, Qaraqalpaqstan Respublikası, walayatlar hám Tashkent qalasında, sonday-aq, hár bir qala hám rayonda Ózbekstan Respublikası Prezidentiniń Xalıq qabıllawxanaları ashıldı.
Búgingi kúnde, Ózbekstan Respublikası Prezidentiniń Xalıq qabıllawxanaları xalıq penen tikkeley sóylesiwlerdi shólkemlestiriw, fizikalıq hám yuridikalıq shaxslardıń huqıqların tolıq qorǵawǵa qaratılǵan uyımǵa aylandı.
Ózbekstan Respublikası Oliy Majlisi Senatı Kengashiniń 2017-jıl
9-avgusttaǵı 214-III-sanlı hám Nızamshılıq palatası Kengashiniń 2017-jıl
9-avgusttaǵı KQ-1004-III-sanlı qararları hámde Qaraqalpaqstan Respublikası Joqarǵı Keńesiniń 2017-jıl 11-avgusttaǵı 151/XVII-sanlı sessiya qararı menen Xojeli rayonı quramındaǵı «Keneges», «Saraykól», «Naymankól» mákan puqaralar jıyınları hám Taqıyatas qalası aymaqları birlestirilip, Taqıyatas rayonı shólkemlestirildi.
Taqıyatas rayonında búgingi kúnde xalıq sanı 71,4 mıń bolıp, bul puqaralardıń pikirin, mashqalaların esitiw hám olardı sheshiw, sonday-aq olardıń huqıq hám máplerin, múrájaatlardı tolıq hám qısqa múddetlerde qarap shıǵılıwın támiyinlew, jergilikli hákimlik, mákeme hám kárxanalar basshılarınıń juwapkershiligin asırıw hám hár bir múrájaattı óz waqtında kórip shıǵıwdı jolǵa qoyıw maqsetinde rayonda Xalıq qabıllawxanasın shólkemlestiriw zárúrligi payda bolmaqta.
Joqarıdaǵılardı inábatqa alıp, Qaraqalpaqstan Respublikası Ministrler Keńesi qarar etedi:
1. Fizikalıq hám yuridikalıq shaxslardıń múrájaatları menen islesiwdiń sapa jaǵınan jańa sistemasın engiziw hámde Ózbekstan Respublikası Prezidentiniń 2016-jıl 28-dekabrdegi PF-4904-sanlı Pármanı talapların orınlaw maqsetinde Ózbekstan Respublikası Prezidentiniń Taqıyatas rayonındaǵı Xalıq qabıllawxanası shólkemlestirilsin.
2. Qaraqalpaqstan Respublikası Ministrler Keńesiniń Isler Basqarması (M.Djumaniyazov) Qaraqalpaqstan Respublikası Finans ministrligi (M.Sodikov) menen birgelikte:
Ózbekstan Respublikası Prezidentiniń Taqıyatas rayonındaǵı Xalıq qabıllawxanasınıń shtatlar kestesiniń islep shıǵılıwın;
qabıllawxananıń shtatlar kestesin dizimnen ótkeriw hám zárúr qarjılar ajıratılıwın támiyinlesin.
3. Taqıyatas rayonı hákimligine (F.Allambergenov):
- Xalıq qabıllawxanasın tiyisli imarat penen támiyinlew;
- puqaralar ushın qolaylı sharayatlar jaratıw, atap aytqanda, kiriw jolları, panduslar, kútiw hám puqaralardı qabıl etiw xanaları, xızmetkerler ushın xanalar, «Ana hám bala» xanası, sonday-aq sanitariya-gigiena xanaları ajıratıw;
- Xalıq qabıllawxanasın kopyuter, nusqa kóbeytiriw hám basqa da texnikalar, kancelyariya buyımları, baylanıs quralları menen támiyinlew hám olardı Internet tarmaǵına jalǵaw tapsırılsın.
4. Usı qarardıń orınlanıwın támiyinlew Qaraqalpaqstan Respublikası Ministrler Keńesiniń Baslıǵınıń birinshi orınbasarı A.Tajetdinovqa júklensin.
Qaraqalpaqstan Respublikası
Ministrler Keńesiniń Baslıǵı Q.Sariev