O'zbekiston Respublikasi Prezidentining 2018 yil 20 iyundagi “Protez-ortopediya buyumlari va reabilitatsiya texnik vositalarini ishlab chiqarishni rivojlantirish hamda tibbiy-ijtimoiy muassasalarning moddiy-texnika bazasini yanada ko'chaytirish chora-tadbirlari to'g'risida”gi PQ-3787-sonli qarori haqida
O'zbekiston Respublikasi Prezidentining 2017 yil 1 dekabrdagi “Nogironligi bo'lgan shaxslarni davlat tomonidan qo'llab-quvvatlash tizimini tubdan takomillashtirish chora-tadbirlari to'g'risida”gi
PF-5270-son Farmoni va 2018 yil 20 iyundagi “Protez-ortopediya buyumlari va reabilitatsiya texnik vositalarini ishlab chiqarishni rivojlantirish hamda tibbiy-ijtimoiy muassasalarning moddiy-texnika bazasini yanada ko'chaytirish chora-tadbirlari to'g'risida”gi PQ-3787-sonli qarorining ijrosini ta'minlash maqsadida Vazirlar Kengashi qaror qiladi:
1. O'zbekiston Respublikasi Prezidentining 2018 yil 20 iyundagi “Protez-ortopediya buyumlari va reabilitatsiya texnik vositalarini ishlab chiqarishni rivojlantirish hamda tibbiy-ijtimoiy muassasalarning
moddiy-texnika bazasini yanada ko'chaytirish chora-tadbirlari to'g'risida”gi
PQ-3787-sonli qarori ijro uchun rahbarlikka olinsin.
2. O'zbekiston Respublikasi Prezidentining mazkur qarori bilan:
a) tibbiy-ijtimoiy yordam ko'rsatish va reabilitatsiya choralarining samaradorligi va natijadorligini oshirish, tibbiy-ijtimoiy muassasalarni qurish hamda rekonstruktsiya qilishning zamonaviy uslublarini joriy etish orqali aholining ijtimoiy ehtiyojmand toifalarini qabul qilish bo'yicha ularning imkoniyatlarini kengaytirish;
tibbiy-ijtimoiy muassasalar va o'quv-mehnat ustaxonalarini zamonaviy diagnostika qilish, davolash, sport uskunalari va texnik vositalar bilan jihozlash;
mahalliy ishlab chiqariladigan protez-ortopediya buyumlari va reabilitatsiya texnik vositalarining sifatini yaxshilash hamda ularning turlarini kengaytirish;
protez-ortopediya buyumlari va reabilitatsiya texnik vositalarini ishlab chiqarishning yanada rivojlanishini ta'minlaydigan kuchli ilmiy hamda metodologik bazani yaratish;
tibbiy-ijtimoiy yordam ko'rsatish sohasida ilmiy tadqiqotlarni chuqurlashtirish, kadrlarni tayyorlash va qayta tayyorlash;
protez-ortopediya buyumlari va reabilitatsiya texnik vositalarini ishlab chiqarishning xalqaro standartlarini keng joriy etish;
aholining ijtimoiy ehtiyojmand toifalariga tibbiy-ijtimoiy yordam ko'rsatish tizimini yanada takomillashtirishning asosiy yo'nalishlari etib belgilanganligi;
b) Quyidagilar:
2018-2022 yillarda aholining ijtimoiy ehtiyojmand toifalariga tibbiy-ijtimoiy yordam ko'rsatishni yanada chuqurlashtirish va kengaytirish bo'yicha kompleks chora-tadbirlar (keyingi o'rinlarda Kompleks chora-tadbirlar deb yuritiladi) 1-ilovaga muvofiq;
2018-2022 yillarda O'zbekiston Respublikasi Sog'liqni saqlash vazirligining tibbiy-ijtimoiy muassasalarini qurish va rekonstruktsiya qilishni moliyalashtirishning asosiy parametrlari 2-ilovaga muvofiq tasdiqlanganligi;
v) 2021 yil 1 yanvarga qadar muddatga:
korxonalar bo'shayotgan mablag'larni zamonaviy uskunalar bilan jihozlash va ularga servis xizmati ko'rsatish, ehtiyot qismlarni xarid qilish, ishlab chiqarish quvvatini oshirish, bino va inshootlarni qurish hamda rekonstruktsiya qilishga, shuningdek, korxonaning protezchi mutaxassislarini o'qitish (tayyorlash, qayta tayyorlash) va malakasini oshirishga maqsadli yo'naltirgan holda, protez-ortopediya buyumlari va reabilitatsiya texnik vositalarining ishlab chiqarilgan hajmi bo'yicha yagona soliq to'lovi va davlat maqsadli jamg'armalariga majburiy ajratmalardan (yagona ijtimoiy to'lovdan tashqari);
protez-ortopediya buyumlari va reabilitatsiya texnik vositalarini ishlab chiqaruvchi korxonalar hamda O'zbekiston Respublikasi Sog'liqni saqlash vazirligining tibbiy-ijtimoiy muassasalari belgilangan tartibda shakllantiriladigan ro'yxatlar bo'yicha O'zbekiston Respublikasiga olib kiriladigan butlovchi buyumlar va ehtiyot qismlar, instrumentlar va priborlar, kompyuter hamda diagnostika uskunalari bojxona to'lovlaridan (bojxona rasmiylashtiruvi yig'imidan tashqari) ozod qilinganligi;
g) O'zbekiston Respublikasi Innovatsion rivojlanish vazirligiga Iqtisodiyot vazirligi, Sog'liqni saqlash vazirligi, Moliya vazirligi, Investitsiyalar bo'yicha davlat qo'mitasi, “O'zstandart” agentligi va boshqa manfaatdor idoralar bilan birgalikda ikki oy muddatda:
mahalliy ishlab chiqariladigan protez-ortopediya buyumlari va reabilitatsiya texnik vositalari turlarini kengaytirish va ularning sifatini yaxshilash masalalarini o'rganish, shuningdek, loyihalarning keyinchalik respublikada, jumladan, erkin iqtisodiy zonalar va kichik sanoat zonalari hududida amalga oshirilishini ta'minlash;
Kompleks chora-tadbirlarda nazarda tutilgan tadbirlarni amalga oshirish uchun protez-ortopediya buyumlari va reabilitatsiya texnik vositalarini ishlab chiqaruvchi etakchi xorijiy korxonalarni, chet el investitsiyalarini, xalqaro moliya institutlari, xorijiy hukumat jamg'armalari va tashkilotlarining grantlari, kreditlari hamda maqsadli mablag'larini jalb qilish bo'yicha zarur chora-tadbirlarni ko'rish.
O'zbekiston Respublikasi Tashqi ishlar vazirligiga Innovatsion rivojlanish vazirligiga mazkur band bilan yuklatilgan vazifalarni bajarishda to'liq ko'maklashish topshirilganligi;
d) O'zbekiston Respublikasi Markaziy bankiga tijorat banklari va Innovatsion rivojlanish vazirligi bilan birgalikda protez-ortopediya buyumlari va reabilitatsiya texnik vositalarini ishlab chiqaruvchi korxonalarga protez-ortopediya buyumlari va reabilitatsiya texnik vositalarini ishlab chiqaruvchi mahalliy korxonalarni zamonaviy uskunalar bilan jihozlash va ularga servis xizmati ko'rsatish, ehtiyot qismlarni xarid qilish, ishlab chiqarish quvvatini oshirish, bino va inshootlarni qurish hamda rekonstruktsiya qilish, shuningdek, protezchi mutaxassislarni o'qitish (tayyorlash, qayta tayyorlash) va ularning malakasini oshirish uchun O'zbekiston Respublikasi Markaziy bankining qayta moliyalashtirish stavkasi bo'yicha kredit berish tavsiya etilganligi;
e) O'zbekiston Respublikasi Sog'liqni saqlash vazirligiga Kompleks
chora-tadbirlarning o'z vaqtida ijro etilishi ustidan tanqidiy tahlil va ta'sirchan nazorat olib borilishini ta'minlashi, bunda quyidagi ustuvor vazifalarning bajarilishiga alohida e’tibor qaratish topshirilganligi:
nogironligi bo'lgan shaxslarni tibbiy-ijtimoiy reabilitatsiya qilish samaradorligi va natijadorligini oshirish, “Muruvvat” va “Saxovat” internat uylari tizimini yanada rivojlantirish;
tibbiy-ijtimoiy muassasalarning aholining ijtimoiy ehtiyojmand toifalarini qabul qilish bo'yicha imkoniyatlarini kengaytirish;
ishlab chiqarilayotgan protez-ortopediya buyumlari va reabilitatsiya texnik vositalarining sifatini yaxshilash va ularning turlarini kengaytirish;
j) O'zbekiston Respublikasi Sog'liqni saqlash vazirligiga:
O'zbekiston Respublikasi Investitsiyalar bo'yicha davlat qo'mitasi, Iqtisodiyot vazirligi, Moliya vazirligi, shuningdek, Qoraqalpog'iston Respublikasi Vazirlar Kengashi, viloyatlar va Toshkent shahar hokimliklari bilan birgalikda tegishli davrlar uchun loyihalar portfellarini ishlab chiqishda ularda shakllantiriladigan O'zbekiston Respublikasini rivojlantirish davlat dasturlariga keyinchalik loyihalarni kiritish uchun byudjet mablag'lari hisobiga ajratiladigan markazlashtirilgan investitsiyalar limitlari doirasida amalga oshiriladigan, mazkur qarorning 2-ilovasiga muvofiq tibbiy-ijtimoiy muassasalarni qurish va rekonstruktsiya qilish loyihalarini nazarda tutish;
O'zbekiston Respublikasi Oliy va o'rta maxsus ta'lim vazirligi bilan birgalikda protezchi mutaxassislarga bo'lgan ehtiyojni o'rganish hamda 2019/2020 o'quv yilidan boshlab o'rta maxsus, kasb-hunar va oliy ma'lumotli protezchi mutaxassislarni tayyorlash bo'yicha taklif kiritish;
Qoraqalpog'iston Respublikasi Vazirlar Kengashi, viloyatlar va Toshkent shahar hokimliklari bilan birgalikda ushbu qaror ijrosining borishi to'g'risidagi axborotning har chorakda O'zbekiston Respublikasi Vazirlar Mahkamasiga taqdim etilishini ta'minlash topshirilganligi;
z) O'zbekiston Respublikasi Moliya vazirligiga Sog'liqni saqlash vazirligi va O'zbekiston Respublikasi Prezidenti huzuridagi Loyiha boshqaruvi milliy agentligi bilan birgalikda ikki oy muddatda
tibbiy-ijtimoiy muassasalarning binolarini qurish, rekonstruktsiya qilish va kapital ta'mirlash tadbirlarini moliyalashtirishning amaldagi tartibi tanqidiy qayta ko'rib chiqilishini ta'minlash hamda mazkur sohada ortiqcha tartib-taomillarni chiqarib tashlash, ishlarning shaffofligini ta'minlash va sifatini yanada oshirish bo'yicha aniq takliflarni kiritish topshirilganligi;
i) O'zbekiston Respublikasi Prezidentining 2016 yil 28 dekabrdagi “Keksalar va nogironlarni davlat tomonidan qo'llab-quvvatlash tizimini yanada takomillashtirishga doir qo'shimcha chora-tadbirlar to'g'risida”gi
PQ–2705-son qarorida:
2-bandining uchinchi xatboshisi chiqarib tashlash;
6 va 7-bandlari, shuningdek, 2-ilovasi o'z kuchini yo'qotgan deb hisoblanishi ma'lumot uchun qabul qilinsin.
3. Quyidagilar:
2018-2022 yillarda aholining ijtimoiy ehtiyojmand toifalariga tibbiy-ijtimoiy yordam ko'rsatishni yanada chuqurlashtirish va kengaytirish bo'yicha kompleks chora-tadbirlar 1-ilovaga muvofiq;
2018-2022 yillarda Qoraqalpog'iston Respublikasi Sog'liqni saqlash vazirligining tibbiy-ijtimoiy muassasalarini qurish va rekonstruktsiya qilishni moliyalashtirishning asosiy parametrlari 2-ilovaga muvofiq tasdiqlansin.
4. Tuman (shahar) hokimliklari Qoraqalpog'iston Respublikasi Sog'liqni saqlash vazirligi bilan birgalikda bir oy muddatda 2018-2022 yillarda aholining ijtimoiy ehtiyojmand toifalariga tibbiy-ijtimoiy yordam ko'rsatishni yanada chuqurlashtirish va kengaytirish bo'yicha hududiy kompleks chora-tadbirlarni ularning ijro muddatlari, mas’ul ijrochilari, shuningdek, moliyalashtirish manbalarini aniq ko'rsatgan holda ishlab chiqsin hamda tasdiqlasin.
5. Qoraqalpog'iston Respublikasi Sog'liqni saqlash vazirligi:
oliy ta'lim muassasalari bilan birgalikda protezchi mutaxassislarga bo'lgan ehtiyojni o'rgansin hamda 2019-2020 o'quv yilidan boshlab o'rta maxsus, kasb-hunar va oliy ma'lumotli protezchi mutaxassislarni tayyorlash bo'yicha O'zbekiston Respublikasi Sog'liqni saqlash vazirligiga hamda Vazirlar Kengashiga taklif kiritsin.
tuman (shahar) hokimliklari bilan birgalikda ushbu qaror ijrosining borishi to'g'risidagi axborotning har chorakda Qoraqalpog'iston Respublikasi Vazirlar Kengashiga taqdim etilishini ta'minlasin.
6. Qoraqalpog'iston Respublikasi Vazirlar Kengashining 2017 yil
3 yanvardagi “O'zbekiston Respublikasi Prezidentining 2016 yil
28 dekabrdagi “Keksalar va nogironlarni davlat tomonidan qo'llab-quvvatlash tizimini yanada takomillashtirishga doir qo'shimcha chora-tadbirlar to'g'risida”gi PQ-2705-sonli qarori haqida”gi 1-sonli qarorining 6-bandi o'z kuchini yo'qotgan deb hisoblansin.
7. Vazirlik va idoralar bir oy muddatda o'zlari qabul qilgan idoraviy normativ-huquqiy hujjatlarni mazkur qarorga muvofiqlashtirsin.
8. Mazkur qarorning bajarilishini nazorat qilish Qoraqalpog'iston Respublikasi Vazirlar Kengashi Raisining o'rinbosari M.Jumanov zimmasiga yuklansin.
Qoraqalpog'iston Respublikasi
Vazirlar Kengashining Raisi Q.Sariev