Qaraqalpaqstan Respublikası Ministrler Keńesi

2021-jıl 26-may kúni Evropa Awqamınıń Oraylıq Aziya boyınsha arnawlı wákili P.Burian basshılıǵındaǵı Evropa Awqamı delegaciyası Nókiske keldi. Delegaciya quramında Evropa Awqamınıń Ózbekstandaǵı elshisi Sharlotta Adrianda bar.

Delegaciya aǵzaları dáslep Nókis qalalıq emlewxanasında bolıp, perinatal salamatlıqtı saqlaw joybarı sheńberinde medicinalıq ásbap-úskenelerdi tapsırıw máresimine qatnastı.

Ilaj dawamında Qaraqalpaqstan Respublikası neonatal intensiv terapiya bólimleri hám operaciya xanaları ushın 300 dana operaciya ásbapları, elektrokardiografiya maslamaları, ultrasesli apparatlar, hawa basımı apparatları tapsırıldı.

P.Burian Qaraqalpaqstanda densawlıqtı saqlaw, sociallıq rawajlanıw hám bilimlendiriw tarawındaǵı rawajlanıwlardı joqarı bahaladı.

 

Bunnan keyin Qaraqalpaqstan Respublikası Ministrler Keńesi Baslıǵı Q.Sariev Evropa Awqamınıń Oraylıq Aziya boyınsha arnawlı wákili P.Burian menen ushırastı.

Ushırasıwǵa Qaraqalpaqstan Respublikası Ministrler Keńesi Baslıǵınıń orınbasarı R.Zarikeev penen Evropa Awqamınıń Ózbekstandaǵı elshisi Sharlotta Adrianlar qatnastı. 

Dáslep miymanlarǵa Qaraqalpaqstan Respublikasında Prezident Sh.Mirziyoev basshılıǵında ámelge asırılıp atırǵan keń kólemli qurılıs jumısları hám jańalanıwlar boyınsha maǵlıwmat berildi.

Alıs aymaqlarda jasawshı puqaralardıń turmıs dárejesin jaqsılawǵa joqarı itibar berilip atırǵanı, regionda densawlıqtı saqlaw, Aral apatshılıǵıń unamsız tásirlerin jumsartıwǵa qaratılǵan kólemli jumıslar haqqında atap ótildi.

Q.Sariev Aral boyına járdem kórsetiwde xalıqaralıq sheriklerdiń iskerligi barǵan sayın jedellesip atırǵanın ayrıqsha atap ótti. 

Ministrler Keńesi Baslıǵı Q.Sariev Evropa Awqamınıń Oraylıq Aziya boyınsha arnawlı wákili P.Buriannıń búgingi kúndegi miynetlerin joqarı bahaladı hám óziniń minnetdarshılıǵın bildirdi.