baspaǵa shıǵarıw
Aldın xabar
berilgenindey, Qaraqalpaqstan Respublikası Ministrler Keńesiniń Yuridikalıq
xızmeti tárepinen “Qaraqalpaqstan Respublikası Ministrler Keńesiniń
Reglamentine ózgeris hám qosımshalar kirgiziw haqqında”ǵı Ministrler Keńesiniń
qarar joybarı islep shıǵıldı hám jámiyetshilik dodalawı ushın portalǵa jaylastırılǵan edi. Aytıp ótiw kerek, bul
qarar joybarınıń islep shıǵılıwınan tiykarǵı maqset puqaralar hám isbilermenlik
iskerligine tiyisli qararlar qabıl etiw procesiniń ashıqlıǵın támiyinlewdi ele
de jetilistiriw, Ministrler Keńesiniń hújjetleri tiykarında pul qarjıları
ajratılıwı hám sarıplanıwında mámleketlik uyımlar hám shólkemler birinshi
basshılarınıń jeke juwapkershiligin jáne de asırıw boyınsha qosımsha is-ilajlardı
belgilep beredi.
Usı
múnásebet penen, Ministrler Keńesiniń 2022-jıl 17-sentyabrdegi
466-13-0-Q/22-san qararı menen Ministrler Keńesiniń Reglamentine tiyisli
ózgeris hám qosımshalar kirgizildi. Endilikte, Ministrler Keńesiniń
Reglamentine kirgizilgen usı ózgeris hám qosımshalarǵa muwapıq:
Ministrler
Keńesi hújjetleriniń joybarlarına fizikalıq hám yuridikalıq shaxslar ushın
juwapkerlik belgileytuǵın huqıqıy normalar kiritiliwi qadaǵan etiledi;
xojalıq
basqarıwı uyımları wákilligine kiretuǵın máseleler hám korporativ qatnasıqlardı
nızam astı hújjetlerin qabıllaw yamasa hákimshilik usıllar arqalı tártipke
salıw qadaǵan etiledi;
pul
qarjıların ajıratıw, sonıń menen birge, mámleketlik satıp alıwlardı ámelge
asırıw máselelerine tiyisli joybarlar Ministrler Keńesiniń Korrupciyaǵa qarsı
ishki qadaǵalaw bólimi menen májburiy tártipte kelisiledi;
usınıs
etilgen joybarlar hám oǵan tiykar bolǵan barlıq hújjetler (sonday-aq,
joybar-smeta hújjetler)diń sapalı, hár tárepleme islep shıǵılıwı,
maǵlıwmatlardıń tuwrılıǵı, olardı ámelge asırıwdıń sońǵı nátiyjeleri hám
aqıbetleri, ajratılıp atırǵan (sarıplanıp atırǵan) pul qarjları hám basqa
tovar-materiallıq baylıqlardıń maqsetke muwapıq ajratılıwı hám sarıplanıwı
ushın mámleketlik uyımlar hám shólkemlerdiń birinshi basshıları, sonday-aq,
tiyisli taraw baslıqları jeke juwapker esaplanadı.
Qaraqalpaqstan
Respublikasınıń “Normativlik huqıqıy aktler haqqında”ǵı Nızamı talaplarınan
kelip shıǵıp, hámmeniń tanısıwı ushın bul qarar rásmiy dereklerde, atap
aytqanda, “Erkin Qaraqalpaqstan” gazetasınıń 2022-jıl 20-sentyabr kúngi
113-sanında, “Qaraqalpaqstan tańı” gazetasınıń 2022-jıl 24-sentyabr kúngi
36-37-sanında, Ministrler Keńesiniń rásmiy veb saytında, sonday-aq, Ózbekstan
Respublikası nızamshılıq maǵlıwmatları milliy bazasında járiyalandı. Usı orında
aytıp ótiw orınlı, Ministrler Keńesiniń Reglamenti menen usı silteme arqalı tolıq tanısıp shıǵıwıńız múmkin.
J. Idiyatullaev hám A. Imatov
(Qaraqalpaqstan Respublikası Ministrler Keńesiniń Yuridikalıq xizmeti)