Qaraqalpaqstan Respublikası Ministrler Keńesi

Ámiwdárya rayonında «Qarlıǵash» balalar jazǵı dem alıw orayı óz jumısın basladı.

Usı múnásibet penen ótkerilgen ilajda atap ótilgenindey, bul jerde balalardıń kewilli dem alıwı ushın barlıq sharayat jaratılǵan, Ásirese, kórkem suw basseynleri, sport maydanshaları hám túrli átkónshekler olardıń mazmunlı dem alıwına xızmet etedi.

Bul dem alıw orayında rayondaǵı 87 mekteptiń 7 jastan 14 jasqa shekemgi oqıwshıları dem aladı. Dem alıwshılardıń salamatlıǵı, tazalıǵı, awqatlanıw tártibi shıpakerlerdiń turaqlı baqlawında bolıp, olardıń qáwipsizligin támiyinlew turaqlı qadaǵalanıp barıladı.

Bul jerde balalarǵa joqarı maǵlıwmatlı, tájiriybeli tárbiyashılar hám jetekshiler biriktirilgen. 9-avgustqa shekem 500 balanıń dem alıwı rejelestirilgen.

Orayda hár kúni jas kitapqumar, shet tileri, muzıka, súwret hám basqa da dógereklerdegi sabaqlar, shınıǵıwlar arqalı dem alıwshılardıń bilimi jetilistirilip barıladı. Bunnan tısqarı futbol, voleybol, basketbol, kórkem gimnastika, shaxmat-shashka, stol tennisi, júziw hám basqa sport túrleri menen shuǵıllanıwı ushın barlıq sharayat jaratılǵan.

Bunday sharayatlar balalardıń salamat ósiwine, bilim hám dúnyaǵa kóz-qarasınıń keńeyiwine, tuwılǵan elge, onıń biytákirar tábiyatına bolǵan súyispenshiligin arttırıwǵa xızmet etedi.