baspaǵa shıǵarıw
Qaraqalpaqstan Respublikasınıń Bozataw, Qaraózek, Kegeyli, Qońırat, Qanlıkól, Moynaq, Taqıyatas, Taxtakópir, Xojeli, Shımbay, Shomanay rayonlarında bar bolǵan jer hám suw resurslarınan nátiyjeli paydalanıw, awıl xojalıǵı hám isbilermenlikti qollap-quwatlaw, xalıqtıń bántligin támiyinlew hám daramatın arttırıw sonıń menen birge, qolaylı agrobiznes ortalıǵın jaratıw maqsetinde «Qaraqalpaqstan Respublikasınıń arqa rayonlarında isbilermenlikti rawajlandırıwdıń qosımsha is-ilájları haqqında»ǵı Ózbekstan Respublikası Prezidentiniń PQ-264-sanlı qararı qabıl etildi.
Búgin Ministrler Keńesinde usı qarardıń mazmun-mánisi hám
onıń orınlanıwı boyınsha videoselektor bolıp ótti.
Videoselektor májilisine Ózbekstan Respublikası Bas ministr
orınbasarı Sh.Ǵaniev, Qaraqalpaqstan Respublikası Ministrler Keńesiniń Baslıǵı
Q.Sariev, rayon hákimleri hám taraw qánigeleri qatnastı.
Qararda Qaraqalpaqstan Respublikasınıń arqa rayonlarında
jaylasqan bos turǵan mámleketlik kóshpes múlk obektlerin satıwdıń burınǵısınan
basqasha túrde aukcion sawdalarındaǵı bahasına qaramastan barlıq qarıydarlarǵa
satıp alıw tólemlerin 7 jıl múddette bólip tólew;
Aukcion sawdalarında satılǵan kóshpes múlk obektleri
boyınsha dúzilgen aldı-sattı shártnamalarına muwapıq tólemler 3 ay ishinde
tolıq tólengende shártnama bahasınıń 25 payızına teń muǵdarda shegirme beriw;
Fizikalıq hám yuridikalıq shaxslarǵa isbilermenlik hám qala qurılısı jumısın ámelge asırıw ushın awıl xojalıǵına mólsherlenbegen bos turǵan jer uchastkalarına ijara huqıqın elektron onlayn-aukcionda satıp alıw bahasın 5 jıl dawamında bólip tólew imkaniyatın jaratıw belgilep qoyılǵan.
