baspaǵa shıǵarıw
«Qaraqalpaqstan Respublikasınıń Mámleketlik gerbi haqqında»ǵı Nızam 1993-jıl 9-aprelde Qaraqalpaqstan Respublikası Joqarǵı Sovetiniń XII sessiyasında qabıllandı.
Qaraqalpaqstan Respublikasınıń Mámleketlik gerbi Qaraqalpaqstan Respublikasınıń suverenli mámleket ekenin ańlatadı.
Qaraqalpaqstan Respublikasınıń Mámleketlik gerbiniń –ońı tárepinde salı masaqları, sol tárepinde ashılǵan paxta, paxtanıń górekleri hám taw artınan shıǵıp kiyatırǵan quyash, Ámiwdárya hám Aral mısalı bolǵan dárya hám teńiz suwretlengen.
Gerbtiń joqarǵı bóleginde segiz qırlı formadaǵı súwret bolıp, ol xalıqlar birliginiń, onıń ishindegi yarım ay hám juldız suwreti musılmanlardıń muqaddes tımsalı esaplanadı. Gerbtiń orayında saqıylıq, ullılıq hám belsendilik tımsalı bolǵan tań qalarlıqtay qumay qusı qanatların jayıp tur. Qumay qus suwretiniń artında qaraqalpaq xalqınıń tariyxıy-mádeniy esteligi esaplanǵan «Shılpıq» qorǵanınıń, yaǵnıy xalqımızdıń mádeniyatı menen tariyxı uzaq-uzaqlarǵa barıp taqalsa da barqulla nawqıran hám erkinligin ańlatıwshı qorǵan súwretlengen.
Gerbtiń tómengi bóleginde Respublikanıń mámleketlik
bayraǵın ańlatıwshı dástelengen lentaǵa " Qaraqalpaqstan" dep jazıp
qoyılǵan.