Qaraqalpaqstan Respublikası Ministrler Keńesi

Pútkil elimiz boylap jasarıw hám jańalanıw, jaqsılıq hám keńpeyillik áyyyamı – Nawrız ulıwma xalıqlıq bayramı joqarı shólkemleskenlik penen belgilenbekte.  

Búgin ulıstıń ullı kúni paytaxtımızdaǵı I.V.Savickiy atındaǵı Qaraqalpaqstan mámleketlik kórkem óner muzeyi aldında kóterińki ruwxta ótkerilmekte.

Muzey aldı Nawrız bayramına say etip, oyanıw pasılı báhár hám milliyligimizdi sáwlelendiriwshi bezewler menen bezetilgen.

Bayram ilajına Qaraqalpaqstan Respublikası Joqarǵı Keńesiniń Baslıǵı M.Kamalov hám Ministrler Keńesiniń Baslıǵı Q.Sariev  qatnastı.

Nawrız ulıwma xalıqlıq bayramı múnásibeti menen kórkem óner sheberleri menen birge jas talant iyeleri tárepinen atqarılǵan teatrlastırılǵan bayram tamashası, milliy qosıq hám oyınlar jıynalǵanlarǵa bayram keypiyatın inam etpekte.

Nawrız ulıwma xalıqlıq bayramı múnásibeti menen paytaxtımızdaǵı Jaslar orayı aldındaǵı maydanda da bayram seyilleri ótkerilmekte.

Xalqımız milliy tikleniw hám milliy rawajlanıwdıń jańa basqıshına qádem qoyǵan házirgi waqıtta barlıq iygilikli qádiriyatlarımız benen dástúrlerimiz qatarı Nawrız bayramınıń da turmısımızdaǵı ornı hám áhmiyeti artıp barmaqta.

Ásirese, ósip kiyatırǵan jas áwladtı kámil insanlar etip tárbiyalawda, olardıń qálbinde watansúyiwshilik, milliy qádriyatlarımızǵa húrmet, tábiyattı qásterlep-abaylaw sıyaqlı sezimlerdi oyatıwda bul áyyemgi bayram úlken áhmiyetke iye.

Bayram seyillerinde xalqımızǵa inam etilgen koncert baǵdarlamaları hám saxnalastırılǵan bayram tamashaları jıynalǵanlarǵa úlken zawıq baǵıshladı.

Elimiz boylap bayram seyilleri  dawam etpekte.

QR Ministrler Keńesiniń Málimleme xızmeti