baspaǵa shıǵarıw
Búgin Respublikalıq qánigelestirilgen kóz mikroxirurgiyası
ilimiy-ámeliy medicina orayınıń Qaraqalpaqstan filialına ÓzR Sırtqı isler
ministrligi arqalı Ózbekstannıń Ullı Britaniyadaǵı elshixanası qáwenderliginde
kózdiń tor perdesinde quramalı operaciyalardı islew imkanın beretuǵın qımbat
bahalı «Vitreoretinal kompleks» medicinalıq apparatları gumanitar járdem
sıpatında alıp kelindi.
Gumanitar járdemdi tapsırıw ilajına ÓzR Sırtqı isler
ministrliginiń investiciya basqarması baslıǵı orınbasarı A.Xasanov, ÓzR Sırtqı
isler ministrliginiń Qaraqalpaqstan Respublikası basqarması baslıǵı M.Ǵaniev,
QR Densawlıqtı saqlaw ministri orınbasarı A.Asqarov, Respublikalıq
qánigelestirilgen kóz mikroxirurgiyası ilimiy-ámeliy medicina orayınıń
Qaraqalpaqstan filialı direktorı Ya.Saliev hám filialdıń medicina xızmetkerleri
qatnastı. Ilajda sózge shıqqanlar bul zamanagóy medicinalıq apparatlar menen
kóz keselliklerin emlewdiń abzallıǵı hám densawlıqtı saqlaw tarawında sırt el
mámleketleri menen birge islesiwdiń áhmiyeti jóninde toqtalıp ótti.
– Bul
medicinalıq apparatlar biziń respublikamızǵa júdá zárúr edi. Óytkeni, kózdiń
tor perdesinde operaciyalardı islew múmkinshiligi bizde bolmaǵanı ushın,
nawqaslardı Tashkent qalasına jiberetuǵın edik. Bul bolsa, nawqaslar ushın
barıp-keliw ǵárejetleri menen qosa júdá qımbatqa túser edi. Endi bolsa búgin
kelip atırǵan usı medicinalıq apparatlar menen eń quramalı operaciyalar
ózimizde islenedi. Bul zamanagóy apparatlarda operaciyalardı ámelge asırıw
ushın filialımızda 2 qánige tayar, olar arnayı Koreya Respublikasında oqıtılǵan.
Házir bolsa jáne bir qánigemizdi QR Densawlıqtı saqlaw ministrligi járdeminde
Rossiya mámleketiniń oraylıq qalalarında oqıtıp, tájiriybesin arttırıwdı
rejelestirmektemiz. Sonı da aytıp ótiw kerek, bul apparatlar menen nawqaslardı
operaciya islew basqa jaqlarǵa salıstırǵanda arzanıraq hám balalar ushın tolıq
biypul boladı, – deydi Respublikalıq qánigelestirilgen kóz mikroxirurgiyası
ilimiy-ámeliy medicina orayınıń Qaraqalpaqstan filialı direktorı Yahiya Saliev.
Maǵlıwmat
ushın, bul zamanagóy apparatlar arqalı quramalı operaciyalardı orınlaw bunnan 2
jıl aldın Tashkent qalasınan baslanǵan bolıp, házirgi waqıtta basqa
wálayatlarda bul operaciyalar jolǵa
qoyılmaǵan.
QR
Densawlıqtı saqlaw ministrligi Málimleme xızmeti