baspaǵa shıǵarıw
Respublikamız aymaǵında hawa rayınıń keskin suwıtıwına, ásirese túngi waqıtları hawa rayınıń normadan 5-7 dárejege pás bolıwı baqlanıp atırǵanlıǵına baylanıslı avariyalıq jaǵdaylardıń aldın alıw, sociallıq taraw shólkemleri imaratlarında zárúr temperaturanı saqlaw, tutınıwshılardı ıssılıq energiyası hám jeterli muǵdarda tábiyǵıy gaz benen támiyinlew maqsetinde Qaraqalpaqstan Respublikası aymaǵında 2021/2022-jıllar jılıtıw máwsiminiń baslanıwı 2021-jıl 6-oktyabrden baslap belgilenedi.
Bul haqqında Qaraqalpaqstan Respublikası Ministrler Keńesiniń arnawlı biyligi qabıl ettildi. Biylik penen tiyisli taraw basshılarına 2021-2022-jıllar jılıtıw máwsiminde tutınıwshılardı belgilengen tártipte elektr hám ıssılıq energiyası, tábiyǵıy gaz, ishimlik suwı, suyıq hám qattı janılǵı menen turaqlı túrde támiyinlew wazıypaları júklendi.
QR Ministrler Keńesiniń Málimleme xızmeti