Qaraqalpaqstan Respublikası Ministrler Keńesi

Usı jıldıń 23-sentyabr kúni Oraylıq saylaw komissiyasınıń gezektegi jıynalısı bolıp ótti. Onda videokonferencbaylanıs tárizinde 1-Qaraqalpaqstan okruglik saylaw komissiyası aǵzaları da qatnastı. 

Májiliste Ózbekstan Respublikası Prezidenti saylawına tiyisli saylaw byulleteniniń formasın hám tekstin tastıyıqlaw, Ózbekstan Respublikası Prezidenti saylawında xalıqaralıq shólkemler hám sırt ellerden qatnasatuǵın baqlawshılardı akkreditaciyadan ótkeriw, ǵalaba xabar quralları wákillerin akkreditaciyadan ótkeriw máseleleri dodalandı. 

Ózbekstan Respublikası Saylaw kodeksinde Ózbekstan Respublikası Prezidenti saylawına tiyisli saylaw byulleteniniń forması hám teksti Oraylıq saylaw komissiyası tárepinen tastıyıqlanıwı belgilengen. Usıǵan muwapıq, Oraylıq saylaw komissiyası tárepinen bolıp ótetuǵın saylawlardıń byulleteni tastıyıqlandı. 

Ózbekstan Respublikası Oraylıq saylaw komissiyasınıń 2019-jıl 5-oktyabrddegi qararı menen «Saylaw mapazı dáwirinde ǵalaba xabar quralları wákillerin akkreditaciyadan ótkeriw tártibi haqqında»ǵı ustav tastıyıqlanǵan. Saylaw kodeksine muwapıq, akkreditaciyadan ótken ǵalaba xabar qurallarınıń wákilleri saylawǵa tayarlıq kóriw hám onı ótkeriwge tiyisli barlıq ilajlardı sáwlelendiriw, saylaw kúni dawıs beriw binalarında bolıw, sonıń menen birge, olardı sanap shıǵıw procesinde de qatnasıw huqıqına iye. 

Májiliste aymaqlardan qatnasıp atırǵan ayırım okruglik saylaw komissiyaları baslıqlarınıń Ózbekstan Respublikası Prezidenti saylawına tayarlıq kóriw hám onı ótkeriw boyınsha málimlemeleri tıńlandı. 

Sol kúni ǵalaba xabar quralları wákilleri ushın baspasóz konferenciyası ótkerildi. 

Baspasóz konferenciyasında Qaraqalpaqstan Respublikasındaǵı «Ellikqala» telekanalı hám basqa bir qansha ǵalaba xabar qurallarınıń wákillerin akkreditaciyadan ótkeriw máselesi de dodalanǵanlıǵı hám tiyisli tártipte akkreditaciyadan ótkerilgenligi málim etildi. Solay etip, házirgi waqıtqa shekem Qaraqalpaqstan Respublikasında usı jıldıń 24-oktyabr sánesinde bolıp ótetuǵın siyasiy process hám oǵan tayarlıq jumısların sáwlelendiriwde qatnasatuǵın 40 qa jaqın ǵalaba xabar qurallarınıń wákilleri akkreditaciyadan ótkerildi.