Qaraqalpaqstan Respublikası Ministrler Keńesi

Bala tárbiyalap atırǵan shańaraqlardı qollap-quwatlaw sistemasınıń nátiyjeliligin arttırıw, sociallıq qorǵaw hám járdemge mútáj shańaraqlardıń materiallıq támiynatın kúsheytiw, mútáj shańaraqlardı anıqlawda ulıwma tán alınǵan xalıqaralıq standartlardı hám avtomatlasqan ashıq-aydın elektron bahalaw mexanizmlerin engiziw arqalı napaqalardı tólew sistemasın balalardıń imkaniyatın rawajlandırıw hám kámbaǵallıqtı qısqartıwǵa qaratıw maqsetinde:

Sonday tártip ornatılsın, oǵan muwapıq 2021-jıl 1-sentyabrden baslap:

a) 14 jasqa shekemgi balaları bolǵan shańaraqlarǵa napaqa jáne bala 2 jasqa tolǵanına shekem onı tárbiyalaw napaqası ornına kem támiyinlengen shańaraqlarǵa balalar napaqası (keyingi orınlarda-balalar napaqası) engiziledi. Onda, balalardıń napaqasın tayınlawda:

inabatqa alınatuǵın balalardıń jası 14 jastan 18 jasqa shekem arttırıladı;

tólew múddeti 6 aydan 12 ayǵa shekem sozıladı;

onıń muǵdarın shańaraqtaǵı balalar sanınan kelip shıǵıp belgilew tártibi qollanıladı;

b) jeke-jalǵız bolǵan puqaralarǵa, perzenti bolmaǵan yamasa barlıq perzentleri 18 jastan úlken bolǵan kem támiyinlengen shańaraqlarǵa materiallıq járdem tayınlanadı.

2021-jıl 1-sentyabrden baslap balalar napaqası hám kem támiyinlengen shańaraqlarǵa materiallıq járdem tólemleriniń tómendegi muǵdarları belgilensin:

a) balalar napaqasınıń hár aylıq muǵdarı:

255 000 sum – 3 jastan 18 jasqa shekemgi bir perzenti ushın, 325 000 sum – jası 3 jasqa shekemgi bir kishkene perzenti ushın;

150 000 sum – shańaraqtıń ekinshi perzenti ushın qosımsha;

100 000 sumnan – shańaraqtın úshinshi hám onnan keyingi hár bir perzenti ushın;

b) kem támiyinlengen shańaraqlar ushın materiallıq járdemniń aylıq muǵdarı- 380 000 sum.

Onda, 2021-jıl 1-sentyabrge shekem tayınlanǵan 14 jasqa shekemgi balaları bolǵan shańaraqlarǵa napaqa, bala 2 jasqa tolǵanına shekem onı tárbiyalaw napaqası jáne kem támiyinlengen shańaraqlarǵa materiallıq járdemdi tólew múddetleri tamamlanǵanına shekem, usı túrdegi napaqalar hám materiallıq járdemniń ámeldegi muǵdarları jáne olardı tólew múddetleri saqlap qalınadı.

Qarjı mnistrligi 2021-jıldıń aqırına shekem balalar napaqası hám materiallıq járdem alıwshı kem támiyinlengen shańaraqlar sanınıń ortasha 20 procentke artıwın esapqa alǵan halda 2021-jılı bul ilajlardı qarjılandırıwǵa byudjetten qosımsha qarjı ajıratsın jáne Mámleketlik byudjettiń 2022-jıldaǵı parametrlerin qáliplestiriwde usı pármannıń ámelge asırılıwına baylanıslı qárejetlerdi názerde tutsın.

Sonday tártip ornatılsın, oǵan muwapıq 2021-jıl 1-oktyabrden baslap, «Sociallıq qorǵawdıń birden-bir reestri» málimleme sisteması arqalı kem támiyinlengen dep tán alınǵan shańaraqlar hám shaxslar haqqındaǵı maǵlıwmatlar mápdar ministrlikler hám uyımlarǵa «Elektron húkimet» sisteması uyımlararalıq integraciyalasıw platforması arqalı beriledi.

Qarjı ministrligi (T.Ishmetov) Málimleme texnologiyaları hám qommunikaciyaların rawajlandırıw ministrligi (Sh.Sadikov) menen birgelikte «Sociallıq qorǵawdıń birden-bir reestri» málimleme sisteması maǵlıwmatlar bazasındaǵı kem támiyinlengen dep tán alınǵan shańaraqlar hám shaxslar haqqındaǵı maǵlıwmatlar ministrlikler hám uyımlarǵa «Elektron húkimet» sisteması uyımlararalıq integraciyalasıw platforması arqalı beriliwi jáne málimleme almasıwınıń nátiyjeli islewin támiyinlesin.

Qarjı ministrligi (T.Ishmetov) Ekonomikalıq rawajlanıw hám kámbaǵallıqtı qısqartıw ministrligi (I.Norqulov), Máhálle hám shańaraqtı qollap-quwatlaw ministrligi (R.Mamatov), Bántlik hám miynet qatnasıqları ministrligi (N.Xusanov) menen birgelikte 2021-jıl 20-avgustqa shekem tómendegilerdi názerde tutatuǵın Húkimet qararınıń joybarların Ministrler Kabinetine kirgizsin:

kem támiyinlengen balalı shańaraqlarǵa napaqanı jáne kem támiyinlengen shańaraqlarǵa materiallıq járdemdi tayınlaw hám tólew tártibi;

minimal tutınıw qárejetleriniń bahasın esaplaw tártibi.

Qarjı ministrligi, Ekonomikalıq rawajlanıw hám kámbaǵallıqtı qısqartıw ministrligi, Ózbekstan Milliy málimleme agentligi, Ózbekstan Milliy teleradiokompaniyası, Málimleme hám ǵalaba kommunikaciyalar agentligi usı Pármannıń maqseti, wazıypaları hám bunnan kútilip atırǵan nátiyjelerdi ǵalaba xabar quralları, Internet hám sociallıq tarmaqlarda keńnen sáwlelendiriw jumısların shólkemlestirsin.

Ózbekstan Respublikası Prezidentiniń hám Ózbekstan Respublikası Húkimetiniń ayırım hújjetlerine 1-qosımshaǵa muwapıq ózgerisler hám qosımshalar kirgizilsin.

8. Ózbekstan Respublikası Prezidentiniń hám Ózbekstan Respublikası Húkimetiniń ayırım hújjetleri 2-qosımshaǵa muwapıq óz kúshin joyıtqan dep esaplansın.

9.Qarjı ministrligi bir ay múddette nızamshılıq hújjetlerine usı Pármannan kelip shıǵatuǵın ózgerisler hám qosımshalar haqqında Ministrler Kabinetine usınıs kirgizsin.

1 Usı Pármannıń orınlanıwın nátiyjeli shólkemlestiriwge juwapker hám jeke juwapker etip qarjı ministri T.A.Ishmetov jáne ekonomikalıq rawajlanıw hám kámbaǵallıqtı qısqartıw ministriniń birinshi orınbasarı I.I.Norqulov belgilensin.

Pármannıń orınlanıwın dodalap barıw, juwapker orınlawshı shólkemlerdiń jumısın muwapıqlastırıw hám qadaǵalaw Ózbekstan Respublikası Bas ministriniń orınbasarı J.A.Qwchqorovqa júklensin.

Ámelge asırılıp atırǵan ilajlardıń nátiyjeliligi boyınsha Ózbekstan Respublikası Prezidentine 2021-jıl 1-noyabr hám 2022-jıl 1-aprelge shekem málimleme berilsin.

Ózbekstan Respublikası

Prezidenti Sh.MIRZIYoEV

Tashkent qalası,

2021-jıl 11-avgust