Qaraqalpaqstan Respublikası Ministrler Keńesi

Turnirde elimiz sportshıları menen birge Rossiya, Belarus, Ukraina, Ázerbayjan hámde Kamerunnan kelgen qol urısı sheberleri bellesedi.

Ózbekstan hám Qaraqalpaqstan Respublikası mámleketlik gimnleri atqarıldı.

Turnirdiń saltanatlı ashılıw máresiminde Qaraqalpaqstan Respublikası Joqarǵı Keńesiniń Baslıǵı M.Kamalov qatnastı.

 Máresimde sózge shıqqanlar sportshılarǵa áwmet tiledi.

Turnirdiń dáslepki bellesiwi 65 kilogramm salmaqtaǵı sportshılar arasında boldı. 

Onda jerlesimiz, qol urısı boyınsha eki márte Ózbekstan chempionı, xalıqaralıq turnirlerdiń sıylı orın iyesi Nurpeys Qarlıbaev ázerbayjanlı sportshı, xalıqaralıq turnirler hám jáhán chempionatı sıylı orın iyesi Ruslan Mammadovtı jeńdi.

Sportshımızdı erisken jeńisi menen Qaraqalpaqstan Respublikası Joqarǵı Keńesiniń Baslıǵı M.Kamalov qutlıqlap, oǵan pul sıylıǵı menen estelik sawǵasın tapsırdı.

Turnirdiń 75 kilogramm salmaqtaǵı sportshılar arasındaǵı bellesiwde jerlesimiz, qol urısı boyınsha eki márte Ózbekstan chempionı, xalıqaralıq turnirlerdiń sıylı orın iyesi Sherzad Jumanazarov kamerunlı sportshı Rushie Shaneldi jeńgen bolsa, usı salmaq kategoriyasındaǵı titullıq bellesiwde  qol urısı boyınsha Aziya hám jáhán chempionı Jahongir Jumaev belaruslı Artyom Buloichukti nokautqa ushırattı.

Sportshılarmızdı  Qaraqalpaqstan Respublikası Joqarǵı Keńesiniń Baslıǵı M.Kamalov qutlıqlap, olarǵa pul sıylıqları menen estelik sawǵaların tapsırdı.