Qaraqalpaqstan Respublikası Ministrler Keńesi

Usı jıldıń 29-may kúni Moynaq rayonı hám Aral teńizine ǵalaba xabar quralları wákilleri ushın press-tur shólkemlestirildi. Oǵan respublikamızda hárekette bolǵan jurnalist blogerler qamtıp alındı. Dáslep press-tur qatnasıwshıları Sudoche kólin barıp kórdi. 

\

Ózine tán tábiyatqa iye bolǵan bul kóldi hár túrli quslar mákan etken. Basım kópshilik maydanı qamıslar menen qorshalǵan Sudoche kóli júdá sulıw kóriniske iye. Press-tur qatnasıwshıları bul jerde aq qus, jabayı úyrek, qasqaldaq, bir qazan hám eń baslısı flamingo qusların kóriw baxtına eristi. Óziniń gozzal tábiyatı menen sırt elli miymanlardı ózine tartıp turǵan Sudoche kóliniń ulıwma maydanı 50 mıń gektardan aslam bolıp, bul jerde Ózbekstan Respublikasınıń Qızıl kitabına kirgizilgen 40 túrdegi quslardıń 30 túri jasaydı. 

Sonıń menen birge Press-tur qatnasıwshıları Sudoche kóliniń jaǵasında 1924-jılda qurılǵan Balıq zavodınıń gúwası boldı. Bul jerde balıqshılar awılı jaylasqan bolıp, sol dáwirdegi mektep, emlewxana hám turaq-jaylardıń qaldıqların kóriwge boladı. 

Sapar dawamında ǵhq wákilleri Aral teńizine jetip keldi. Teńiz tolqınlarınıń shawqımı, onıń jaǵaǵa kelip urılıp qaytıwı bir dem tereń oyǵa talıwǵa májbúrleydi. Bir jaǵı Ustyurtge barıp birigip turǵan teńiz bir tegis shayqaladı. Onıń hár bir tamshı suwında úlken máni bar. Teńizdi dáslepki ret kórgenler óziniń sezimlerin jasıra almadı.

Keyingi mánzil Ustyurttegi kononlar boldı. Biyik, hár túrli naǵıslarǵa dóngen kononlar Amerika filmlerin esletedi. Bular, bir waqıtlarda Aral teńiziniń tolqınları menen ayqasqan,  neshshe ásirlik sırlardı ózinde jámlegen kononlar. Olardı kórgen hár bir insanda ózgeshe sezimler oyanadı. Bulardıń barlıǵı elimizdiń gozzal hám qaytalanbas tábiyatı.

Kúnniń ekinshi yarımında press-tur  qatnasıwshılar “Ekologiya” hám “Aral teńizi tariyxı” muzeyleri, «Muynoq mineral tuzi” JShJ menen “Moynaq aeroportı”nda boldı. 

Bir kúnlik press-turdan keyin rayon hákimliginde baspasóz konferenciyası bolıp ótti. Onda ǴXQ wákilleri ózlerin qızıqtırǵan sorawlar hám usınısları menen múrájat etti.

QR Ministrler Keńesiniń Málimleme xızmeti