Qaraqalpaqstan Respublikası Ministrler Keńesi

Qaraqalpaqstan Respublikası prokuraturası Málimleme xızmetiniń xabar beriwinshe,  Ózbekstan Respublikası Ekologiya hám qorshaǵan ortalıqtı qorǵaw komiteti «Qubla Ústirt» milliy tábiyat baǵı inspektorları tárepinen 2021-jıldıń 24-may kúni Qońırat rayonı Ústirt tegisliginde ótkerilgen reyd ilajı dawamında, Qońırat rayonı “Jaslıq” MPJda jasawshı B.R. hám T.R. isimli puqaralar “Ural” markalı 2 dana motociklde aw mıltıǵı járdeminde 11 dana kiyiklerdi nızamsız awlap kiyatırǵan waqtında irkilgen.

Bunnan keyin, puqaralar B.R. hám T.R. lar ózlerine tiyisli bolǵan “Ural” markalı 2 dana motociklin jaǵıp jiberip, inspektorlarǵa tiyisli bolǵan 4 dana qol telefon apparatların tartıp alıp, «Qubla Ústirt» milliy tábiyat baǵına tiyisli bolǵan “Niva” markalı xızmet avtomashinasınıń 4 dana balonların tesip, háreketleniwine tosqınlıq etip, hádiyse ornınan jasırınǵan.

Nátiyjede brakonerler tárepinen haywanat dúnyasına 134 mln.750 mıń sum muǵdarında zıyan jetkerilgen.

Usı halat boyınsha Aral tábiyattı qorǵaw prokuraturası tárepinen ÓzR. Jınayat kodeksiniń tiyisli statyaları menen jınayat isi qozǵatılıp, B.R. hám T.R.lar JPK 221-statyası tártibinde uslandı. 

Házirgi waqıtta dáslepki tergew háreketleri alıp barılmaqta.