baspaǵa shıǵarıw
BMSh Bas Assambleyasınıń Aralboyı aymaǵın ekologiyalıq
innovaciya hám texnologiyalar zonası dep járiyalaw haqqındaǵı rezolyuciyasına
Koreya Respublikasınıń elshisi Kan Chje Kvon óz múnásibetin bildirip, mámleket
Aralboyı aymaǵın qutqarıw joybarlarına 7 million dollarǵa shamalas qarjı
ajıratıp atırǵanı haqqında málim etti.
– Eń aldı menen, Ózbekstandı xalıqaralıq jámiyetshiliktiń
belsendi aǵzası sıpatında BMShtaǵı gezektegi tabısı menen qutlıqlayman. Pútkil
adamzat Aral teńizi krizisine múnásip dárejede qızıǵıwshılıq bildiriwi kerek.
Bul krizis qorshaǵan ortalıq, jergilikli xalıqtıń turmısı, jámiyet hám
mádeniyat, ekonomika hám rawajlanıw, adamzat hám keleshek ushın úlken
mashqalalar payda etti. Bul tek ǵana Oraylıq Aziya emes, sonıń menen birge
Aziya kontinenti ushın áhmiyetli másele bolıp tabıladı, – dep aytıp ótken elshi
Kvon «Dunyo» málimleme agentligine.
Onıń atap ótiwinshe, Koreya Respublikası Aralboyı aymaǵın
qollap-quwatlawǵa tayar. Qubla Koreyanıń ilimiy jámiyetshiligi, medicinalıq
shólkemleri, kompaniyaları hám sociallıq taraw wákilleri Ózbekstan menen
birgelikte usı joybarlardı ámelge asırıwǵa belsene qatnasadı.
Qaraqalpaqstan xabar agentligi