Qaraqalpaqstan Respublikası Ministrler Keńesi

Tariyx ilimleriniń kandidatı, bilimlendiriw tarawınıń veteranı, Respublikalıq Ruwxıylıq hám aǵartıwshılıq orayı Qaraqalpaqstan bóliminiń baslıǵı Atamuratov Tatlımurat Jumamuratovich Ózbekstan veteranlarınıń sociallıq jumısın qollap-quwatlaw «Nuraniy» qorı qáwenderlik Keńesińiń kararına muwapıq «Mehnat faxriysi» kókirek belgisi menen sıylıqlandı. 

Atamuratov Tatlımurat Jumamuratovich óziniń 50 jıllıq miynet jolı dawamında tek ǵana xalıq bilimlendiriw tarawında emes al mámleketlik basqarıw tarawında da  hár qıylı juwapkershilikli lawazımlarda jumıs alıp bardı.

Atap aytqanda 1990-1997-jıllarda Qaraqapaqstan Respublikası Xalıq bilimlendiriw ministri, 1997-2000-jıllarda Qaraqapaqstan Respublikası Ministrler Keńesi Baslıǵınıń orınbasarı, sociallıq máseleler kompleksiniń baslıǵı hám 2000-2008-jıllarda Taxtakópir rayonı hákimi lawazımlarında jumıs alıp bardı.

Óz jumısına talapshań Tatlımurat Jumamuratovich bunnan sońǵı jıllarda da bilimlendiriw tarawında jumıs islep, tarawdıń rawajlanıwına, pedagog kadrlardıń mamanlıǵın arttırıwda, sonday-aq, keleshek áwladqa tıyanaqlı tálim tárbiya beriwdey iygilikli islerge múnásip úles qosıp kelmekte.

Atamuratov Tatlımurat Jumamuratovich 2021-jıldıń fevral ayınan baslap Respublikalıq Ruwxıylıq hám aǵartıwshılıq orayı Qaraqalpaqstan bóliminiń baslıǵı lawazımında islep kelmekte.

Respublikalıq Ruwxıylıq hám aǵartıwshılıq orayı Qaraqalpaqstan bóliminiń málimleme xızmeti