Qaraqalpaqstan Respublikası Ministrler Keńesi

«Qaraqalpaqstan Respublikası Ministrler Keńesi haqında»ǵı Qaraqalpaqstan Respublikası Nızamı, Ózbekstan Respublikası Prezidentiniń  2019-jıl 26-avgusttaǵı «Awıl xojalıǵına mólsherlengen bos turǵan jer uchastkaların beriw jáne arxitektura-qurılıs jumısların ámelge asırıw tártip-qaǵıydaların jáne de jetilistiriw ilajları haqqında»ǵı PQ-4427-sanlı hám Ózbekstan Respublikası Ministrler Kabinetiniń  2019-jıl 20-dekabrdegi «Isbilermenlik hám qala qurılısı jumısın ámelge asırıw ushın bos turǵan jer uchastkaların beriw tártip-qaǵıydaların jáne de jetilistiriw ilajları haqqında»ǵı  1023-sanlı qararlarına muwapıq, isbilermenlik hám qala qurılısı jumısın  ámelge asırıw ushın awıl xojalıǵına mólsherlengen bos turǵan jer uchastkaların elektron onlayn-aukcion arqalı turaqlı paydalanıwǵa beriwdiń minimal bahasın belgilew maqsetinde, Qaraqalpaqstan Respublikası Ministrler Keńesi qarar etedi:

1. Qaraqalpaqstan Respublikası Qarjı ministrligi, Qaraqalpaqstan Respublikası Mámleketlik salıq basqarması jáne Kadastr agentliginiń Qaraqalpaqstan Respublikası basqarması tárepinen 2021-jıldıń 1-yarım jıllıǵı ushın isbilermenlik hám qala qurılısı jumısın ámelge asırıw ushın awıl xojalıǵına mólsherlengen bos turǵan jer uchastkaların elektron onlayn-aukcion arqalı turaqlı paydalanıw huqıqı (0,01 ga maydan) boyınsha islep shıǵılǵan minimal bahası boyınsha usınısları maqullansın.

2. Nókis qalası hám rayonlarda isbilermenlik subektlerine investiciya kirgiziw hám sociallıq minnet júklew shárti menen isbilermenlik hám qala qurılısı jumısın ámelge asırıw ushın awıl xojalıǵına mólsherlengen bos turǵan jer uchastkaların elektron onlayn-aukcion arqalı  0,01 ga jer maydanın turaqlı paydalanıw huqıqı menen beriwdiń  minimal bahası qosımshaǵa muwapıq tastıyıqlansın.

3. Jer uchastkasınan turaqlı paydalanıw huqıqınıń hár bir rayon (qala) ushın minimal bahasın belgilewde jer salıǵınıń jıllıq muǵdarı, jer uchastkasın tańlaw materialların tayarlaw jumıslarınıń bahası hám jer uchastkasına bolǵan huqıqların mámleketlik dizimnen ótkeriwge baylanıslı qárejetler, jer uchastkasınıń jaylasqan ornı, injenerlik-kommunikaciya tarmaqlarına qosılıw noqatlarınıń bar ekenligi sıyaqlı normaları inabatqa alınatuǵınlıǵı belgilensin.

4. Nókis qalası hám rayonlardıń hákimleri, Qaraqalpaqstan Respublikası qurılıs ministrligi (J.Berdixanov), Kadastr agentliginiń Qaraqalpaqstan Respublikası basqarması (I.Tleuov), Mámleketlik kadastrlar palatası Qaraqalpaqstan Respublikası basqarması (U.Jalilov) menen birgelikte belgilengen tártipte yuridikalıq hám fizikalıq táreplerge isbilermenlik hám qala qurılısı jumısın ámelge asırıw ushın jer uchastkaların turaqlı paydalanıwǵa beriw maqsetinde aukcion sawdalarına shıǵarılatuǵının támiyinlesin.

5. Nókis qalası hám rayonlardıń hákimlikleri tárepinen aukcion sawdalarına satılǵan jer maydanlarınan maqsetli hám nátiyjeli paydalanıw boyınsha turaqlı monitoring alıp barsın hám maqsetsiz paydalanıw jaǵdayları anıqlanǵan jaǵdayda jer uchastkaların rezervke alıw ilajları kórilsin.

6. Qaraqalpaqstan Respublikası Mámleketlik salıq basqarması (X.Bekchanov), Kadastr agentliginiń Qaraqalpaqstan Respublikası basqarması (I.Tleuov), Mámleketlik kadastrlar palatası Qaraqalpaqstan Respublikası basqarması (B.Madaminov) bos jer maydanı hám imaratlardı minimal bahasına qatań ámel etiliwi jáne jergilikli byudjetke pul túsimlerin óz waqtında hám tolıq túsiriliwin támiyinlesin.

7. Qaraqalpaqstan Respublikası Mámleketlik salıq basqarması (X.Bekchanov) Nókis qalası hám rayonlar ushın jer uchastkasınan turaqlı paydalanıw huqıqınıń minimal bahasın usı qarar tastıyıqlanǵan sáneden baslap bir jumıs kúni ishinde «YERELEKTRON» avtomatlastırılǵan málimleme sistemasına kirgiziw ilajın kórsin.

8. Qaraqalpaqstan Respublikası Ministrler Keńesiniń 2020-jıl 14-avgusttaǵı 217-sanlı qararı óz kúshin joyıtqan dep esaplansın.

9. Qaraqalpaqstan teleradiokompaniyasına (N.Jaqsımuratova), Qaraqalpaqstan Respublikası Málimleme hám ǵalaba kommunikaciyalar basqarmasına (A.Bekmuratov), Qaraqalpaqstan Málimleme agentligine (B.Nurabullaev) hám «Erkin Qaraqalpaqstan» jáne «Vesti Kaarakalpakstana» gazetaları redakciyasına (Q.Bayniyazov) usı qarardı belgilengen tártipte xalıq hám isbilermenler arasında keńnen úgit-násiyatlaw, maqalalar basıp shıǵarıw jáne ǵalaba xabar quralları arqalı keńnen sáwlelendiriw usınıs etilsin.

10. Usı qarar rásmiy járiyalanǵan kúnnen baslap kúshke kiretuǵınlıǵı belgilep qoyılsın.

11. Usı qarardıń orınlanıwın qadaǵalaw Qaraqalpaqstan Respublikası Ministrler Keńesi Baslıǵınıń birinshi orınbasarı N.Erlepesovqa, Ministrler Keńesi Baslıǵınıń orınbasarlarına (B.Xabibullaev, E.Atashov, S.Xojametov) júklensin.