Qaraqalpaqstan Respublikası Ministrler Keńesi

Usı jıl 18-noyabr kúni Qaraqalpaq mámleketlik Jas tamashagóyler teatrında  «Jańa Ózbekstan-jańasha dúnyaqaras» súreni astında Ózbekstan Respublikası mámleketlik bayraǵı qabıl etilgeniniń 29 jıllıǵına baǵıshlanǵan ilaj bolıp ótti.

Onda Ózbekstan mámleketlik ekonomika universitetiniń rektorı Q.Sharipov, Ózbekstan hám Qaraqalpaqstan xalıq artisti M.Abduqunduzov,  Qaraqalpaqstan Respublikası Máhálle hám shańaraqtı qollap-quwatlaw ministri S.Turmanov hám basqalar shıǵıp sóylep, «Watandı súyiw-iymannandur» bas ideyası menen ótkerilip atırǵan ruwxıy-aǵartıwshılıq, mádeniy ilajlardan gózlengen tiykarǵı maqset, búgin elimizde ámelge asırılıp atırǵan keń kólemli reformalardıń mazmun-mánisi hám áhmiyetin xalıqqa jetkeriw, eń tiykarǵısı olardıń kewil-keypiyatın kóteriw bolıp tabıladı.

Búgingi kúni Qaraqalpaqstan Respublikasında bul baǵdarda 35 úgit-násiyat toparı dúzilgen bolıp, olar 416 awıl hám mákan puqaralar jıyınlarında turǵınlar menen ushırasıwlar ótkermekte.  Bul ushırasıwlarda Prezidentimizdiń basshılıǵında elimizde ámelge asırılıp atırǵan jańalanıwlar procesi  jámiyetshilikke tásirsheń usıllarda jetkerilmekte. Úgit-násiyat ilajlarına birinshi gezekte sociallıq járdemge mútáj adamlar, sonıń ishinde hayal-qızlar, jámlespegen jaslar, kekse áwlad wákilleri, ruwxıy qollap-quwatlawǵa mútáj shańaraq aǵzaları qamtıp alınbaqta.

Qaraqalpaqstan Respublikası Máhálle hám shańaraqtı qollap-quwatlaw ministrligi, onıń qalalıq hám rayonlıq bólimleri tárepinen puqaralar jıyınlarınıń baslıqları menen birgelikte orınlarda belgili siyasatshı hám ilimpazlar, kórkem óner ǵayratkerleri, jazıwshı-shayırlar, sportshılardıń qatnasıwı támiyinlenbekte.

Úgit-násiyat toparı aǵzaları tárepinen hár bir puqarada, sonıń ishinde jaslarımızda  elimizde ámelge asırılıp atırǵan reformalarǵa qatnas tuyǵısın qáliplestiriw, miyrim-shápáát, shúkirshilik, bir-birewge járdem sıyaqlı milliy hám ulıwmainsanıylıq qádiriyatlardı qáliplestiriwge ayrıqsha itibar qaratılmaqta. Usı kóz-qarastan qaraǵanda ótkerilip atırǵan ushırasıwlar qatnasıwshılarda ayrıqsha tásir qaldırmaqta.

Ilaj respublikamız kórkem óner sheberleriniń koncert baǵdarlaması menen dawam etti.

 

D.ABIBULLAEV,

Qaraqalpaqstan xabar agentliginiń sholıwshısı.

M.XABIBULLAEVtıń túsirgen súwretleri