Qaraqalpaqstan Respublikası Ministrler Keńesi

2020 jıl 9-noyabr kúni Ellikqala rayonında Qaraqalpaqstan Respublikasında jumıs alıp barıp atırg‘an GʻXQ wákilleri bolg‘an baspasóz xatkerleri, jurnalist hám blogerler qatnasıwında media-tur menen birge baspasóz konferensiyası  shólkemlestirildi. 

Media-turdıń birinshi obyekti «Cho‘pon» máhálle puxaralar jıyını aymag‘ındag‘ı 10-sanlı mektepke shekemgi bilimlendiriw mákemesiniń ashılıwınan baslandı.

Bunnan keyin qatnasıwshılar rayonda 3,5 gektar jer maydang‘a gidroponika usılında qurılg‘an palız ónimlerin jetistiriwshi ıssıxanada boldı. «Agroeksimgold» gidroponika ıssıxanasında jetistirilgen ónimler Qazaqstan hám Rossiya mámleketlerinde eksportqa shıg‘arılmaqta. 2019-jılda 15 mlrd al, 2020-jılda 20 mlrd sum mug‘darındag‘ı ónim eksportqa shıg‘arılg‘an. Áhmiyetli tárepi gidroponikada 65 jas jumıs penen támiyinlengen. 

Media-tur qatnasıwshılarınıń keyingi mánzili Gúldirsin qala tariyxıy esteligi boldı. Qaladan arxeologiyalıq qazıwlar waqtında orta ásirlerge tiyisli bolg‘an bezeniw buyımları hám teńgeler tabılg‘an. 

Jurnalist blogerler Saxtiyon qalashasındag‘ı Limonariya menende tanıstı. Bul limonariya 3 gektar jer maydang‘a qurılg‘an bolıp. Keyingi jılda tolıq miywe bere baslaydı. 

Mag‘lıwmat ornında atap ótiw orınlı, ıssıxananıń joybar bahası  1275,5 dollardı quraydı. Bul jerdegi limon nálleriniń basım kópshiligi Ferg‘ana wálayatınan alıp kelingen. Issıxana tolıq iske túskennen keyin 85 jas jumıs penen támiyinlenedi.

Kúnnin' ekinshi yarımında qatnasıwlar ushın press-konferensiya shólkemlestirildi.

Eń sońģı mánzil Topıraq qala esteligi boldı. Óziniń og‘ada bay tariyxı menen belgili bolg‘an Topıraq qalanıń  maydanı  500x3500 m. Tórt múyeshli etip  salıng‘an qala  dógeregin  qorshag‘an  qorg‘an  paqsalarы  topıraq  úyindileri  túrinde saqlanыp qalg‘an, paqsalardıń  biyikligi  geybir  jerlerinde  8-9 m ge shekem  jetedi.  Múyeshinde  úsh minaralı  saray boy tiklep  turg‘an.

 

Qala dárwazasınan  baslang‘an kóshe qalanı ekige  bólip  turg‘an, kósheniń eki  boyında  kvartallar (tiykarınan  ónermentler  jasaytug‘ın) jaylasqan bolıp, olardıń birinde  ibadatxana  imaratları jaylasqan.

   Qala imaratlarınıń  birinde  altın  jalatılg‘an jezden  islengen bilezik  kiygizilgen  taw  qoshqarınıń shaqları tabılg‘an, edende  olardıń átirapında  sıy- saeg‘a sıpatında ákelingen  kóp  sanlı  zatlar, shiyshe  ıdıslar,  bezeniw  buyımları, alebastirden  islengen  háykellerdiń sınıqları,  oynap  turg‘an fantastikalıq  nıqaplardыń  paqsag‘a  sızılg‘an súwretleri tabılg‘an. Zalda  áskerlerdiń  háykelleri, al «Patshalar zalı»nda – qam  ılaydan   islengen  patshalardıń  skulpturalıq  figuraları tabıldı. 

QR Ministrler Keńesi Málimleme xızmeti