Qaraqalpaqstan Respublikası Ministrler Keńesi

Qaraqalpaqstan Respublikası Ministrler Keńesiniń májilisler zalında Ózbekstan-Qıtay biznes forumı bolıp ótti.

Biznes-forumda Qıtay Xalıq Respublikasınan kelgen bir topar isbilermenler menen Qaraqalpaqstan Respublikasınıń belsendi isbilermen toparları hám Ǵalaba xabar qurallarınıń wákilleri qatnastı.

Ilajda Ózbekstan Respublikasınıń Qıtay Xalıq Respublikasındaǵı isenimli hám teń huqıqlı elshisi B.Saidov, Ózbekstan Respublikası Prezidenti Adminstraciyasınıń juwaplı xızmetkeri SH.Abdullaev Qaraqalpaqstan Respublikası Ministrler Keńesi Baslıǵınıń Investiciyalar, innovaciyalar, menshiklestirilgen kárxanalarǵa kómeklesiw, erkin ekanomikalıq hám kishi sanaat zonaların hám turizmdi rawajlandırıw máseleleri boyınsha orınbasarı B.Xabibullaev sonday-aq, Qıtaylı jáne jergilikli iri isbilermen toparlar shıǵıp sóyledi.

Atap ótilgenindey, sońǵı payıtta eki el basshılarınıń baslamaları menen Ózbekstan hám Qıtay Xalıq Respublikaları arasında ekonomikalıq hám investiciyalıq baǵdarda tıǵız birge islesiw dawam etpekte. Qaraqalpaqstan Respublikasınıń investiciyalıq potencialı joqarı bolıp, ol qıtaylı birge islesiwshi investorlarda qızıǵıwshılıq oyatpaqta. Búgin Qaraqalpaqstan Respublikasınıń isbilermenleri menen ótkerilip atırǵan biznes-forum usı birge islesiwdi bunnan bılay da rawajlandırıwǵa xızmet etedi.

Biznes-forum dawamında Qaraqalpaqstan Respublikası menen Qıtay Xalıq Respublikasınıń investiciyalıq potencialı, sonıń ishinde, qıtaylı iri kompaniyalardıń islep-shıǵarıw quwatlılıqları keńnen tanıstırıldı hám elimizdiń bir qatar belsendi isbilermenlerine, sonday-aq, nókis qalası hám rayon hákimleriniń Investiciyalar, innovaciyalar, menshiklestirilgen kárxanalarǵa kómeklesiw, erkin ekanomikalıq hám kishi sanaat zonaların hám turizmdi rawajlandırıw máseleleri boyınsha orınbasarlarına qıtaylı isbilermenler tayarlap kelgen bahalı sawǵalar tapsırıldı.

Áhmiyetli tárepi sonda, usı jerdiń ózinde Taxtakópir hám Taqıyatas rayonı hákimleriniń Investiciyalar, innovaciyalar, menshiklestirilgen kárxanalarǵa kómeklesiw, erkin ekanomikalıq hám kishi sanaat zonaların hám turizmdi rawajlandırıw máseleleri boyınsha orınbasarları menen Qıtay Xalıq Respublikasınıń iri isbilermenleri arasında keleshekte birge islesiw boyınsha memorandumǵa qol qoyıldı.

Ózbekstan-Qıtay biznes forumına Qaraqalpaqstan Respublikası Joqarǵı Keńesiniń Baslıǵı M.T.Erniyazov qatnastı hám shıǵıp sóyledi.