baspaǵa shıǵarıw
Xabarıńız bar, bunnan bir neshe jıl ilgeri Taxtakópir rayonında qarakólshilik ilimiy násilshilik tájiriybe stanciyası óz jumısın baslaǵan edi.
Onıń tiykarǵı wazıypası, tarawdı rawajlandırıw, sap qarakól násilli qoylarınıń elita genefondın saqlaw hám kóbeytiw bolıp esaplanadı.
Búgingi kúnde bul jerde 2400 bastan aslam qarakól súr qoyları kútimli baǵılmaqta hám onı qısqı máwsimnen shıǵınsız alıp shıǵıw ushın veterinariyalıq ilájlar óz waqtında ámelge asırılmaqta.
Sonday-aq, shopanlar «Qarakólshilik» awqamı tárepinen gúzgi hám qısqı kiyimler menen támiyinlenbekte.
Bunnan tısqarı, Nókis qalasınıń «Qızketken» elatında jaylasqan «Panaev qarakól klaster» kárxanasında qoy júnin qayta islew jolǵa qoyılǵan.
Ol jámi summası 730 million sumlıq joybar sheńberinde Qıtay mámleketinen tiyisli úskenelerdi satıp alıp, óz jumısın dawam ettirmekte.
Kárxananıń úzliksiz jumıs islewi hám hár qanday jaǵdayda elektr energiyasınan únemli paydalanıw maqsetinde quyash panelleri ornatılǵan.
Sonıń menen birge, Tórtkúl rayonında jumıs alıp barıp atırǵan fermer xojalıqlarında sapalı qaraqalpaq súr terileri jetistirilmekte.
Bul óz gezeginde dúnya mámleketleriniń usı terilerge bolǵan talabın arttırıp, házirgi waqıtta Rossiya, Qazaqstan, Dagistan, Qırǵızstan hám Túrkmenstan sıyaqlı mámleketlerge eksport etilmekte.
Qaraqalpaqstan Respublikası Ministrler Keńesiniń Málimleme xızmeti