baspaǵa shıǵarıw
Ózbekstandaǵı barlıq joqarı oqıw orınları studentleri arasında ótkerilgen «JÍL STUDENTI-2021» respublikalıq tańlawınıń jeńimpazları anıqlandı.
Tańlawdıń respublikalıq basqıshına joqarı oqıw orınları tárepinen 500 ge shamalas hújjet usınılǵan bolıp, olar Ilimler akademiyası, Jaslar isleri agentligi, Innovaciyalıq rawajlanıw ministrligi, Ózbekstan studentler sportı associyaciyası, Sawda-sanaat palatası, Ózbekstan Kórkem óner akademiyası, Mádeniyat ministrligi hám Ózbekstan jazıwshıları awqamı tárepinen bahalandı.
Tańlawdıń juwmaqlawshı basqıshında 37 talaban menen ótkerilgen onlayn sáwbetlesiw hám olardıń islegen prezentaciya jumısları bahalanıp, olar arasınan 21 student tańlaw jeńimpazı dep tabıldı.
Quwanıshlısı, respublikalıq tańlawdıń «JÍLDÍŃ EŃ BILIMLI STUDENTI (óz qánigeligi boyınsha)» nominaciyası boyınsha Ájiniyaz atındaǵı Nókis mámleketlik pedagogikalıq institutı Tábiyǵıy pánler fakultetiniń studenti Gúlbanu Almenova sıylı 2-orın jeńimpazı boldı.
Maǵlıwmat ushın, Gúlbanu Almenova ilimiy basshısı A.Ajiev basshılıǵında alıp barıp atırǵan ilimiy-izertlew jumısları boyınsha usı kúnge shekem 40 tan aslam ilimiy maqalalar hám tezisler jazıp, olardı sırt ellerdegi hám respublikalıq ilimiy jurnallar, konferenciya toplamlarında járiyalap kelmekte.
Ol 2019-2020-oqıw jılında Ibrayım Yusupov atındaǵı stipendiya tańlawı, sonday-aq, ótken jıldıń may ayında ótkerilgen xalıqaralıq ekologiyalıq granttıń jeńimpazı esaplanadı.
NMPI baspasóz xızmeti.