Qaraqalpaqstan Respublikası Ministrler Keńesi

Qaraqalpaqstan Respublikası Ministrler Keńesiniń qararı menen 424 máhállede jumıs alıp baratuǵın hákim járdemshileri lawazımǵa tayınlandı.

Atap aytqanda Nókis qalasında 64, Ámiwdárya rayonı 49, Beruniy rayonında 40, Ellikqala rayonında 37, Tórtkúl rayonında 37,  Kegeyli rayonında 16, Qońırat rayonında 39, Qanlıkól rayonında 11, Qaraózek 13, Moynaq rayonı 12, Nókis rayonı 10, Taqıyatas rayonı 13, Taxtakópir rayonı 17, Xojeli rayonı 26, Shımbay rayonı 22, Shomanay rayonı 13, Bozataw rayonı 5 hákim járdemshileri jumıs baslaytuǵın boldı.

Hákim járdemshileri máhállelerde puqaralardıń mashqalaların úyreniw menen birge isbilermenlik penen shuǵıllanıwdı qálewshilerdiń joybarlarına járdem beredi, kásip-ónerge oqıtıw, qıytaq jer, bos jer hám bos turǵan imaratlardan nátiyjeli paydalanıwǵa baǵdarlaydı. Sonıń menen birge, jańa jumıs orınların jaratıw, máhálle turǵınlarınıń jan basına dáramatın kóbeytiw hám kabaǵallıqtı qısqartıwǵa járdem beredi.

Sonıń menen birge ózine biriktirilgen máhálleni rawajlandırıw boyınsha 2022-jılǵa mólsherlengen «Jol kartası»n islep shıǵadı hám orınlanıwın támiyinleydi.

Ámelge asırılǵan jumıslar jóninde Qaraqalpaqstan Respublikası Ministrler Keńesi Baslıǵınıń Finans, ekonomika hám kámbaǵallıqtı qısqartıw máseleleri boyınsha birinshi orınbasarı menen birge Ministrler Keńesi Baslıǵına esap beredi.

Joqarı nátiyjelerge erisken hákim járdemshileri Milliy kadrlar rezervine kirgiziledi.