Qaraqalpaqstan Respublikası Ministrler Keńesi

Qaraqalpaqstan Respublikasında samal elektr stanciyasın qurıw boyınsha investiciyalıq joybar sheńberinde báhárgi monitoring waqtında usı aymaqta aldın ushıraspaǵan jańa qus túri – shól suwıqtorǵayı (Trumpeter Finch Bucanetes githagineus) anıqlandı, dep jazbaqta ÓzR Energetika ministrligi baspasóz xızmeti.

Atap ótiliwinshe, Energetika ministrligi joybarlardıń qorshaǵan ortalıqqa tásirin úyreniw boyınsha eki basqıshlı qáwip analizin ótkeredi. Birinshi basqıshta Xalıqaralıq rawajlanıw institutları (Jáhán banki, Xalıqaralıq qarjı korporaciyası, Aziya rawajlanıw banki, Evropa tikleniw hám rawajlanıw banki) járdeminde ministrlik derlik bir jıl dawamında maǵlıwmatlardı toplaydı. Bunda tek ǵana joybar ushın ajıratılǵan aymaqta emes, sonıń menen birge, 50 kilometrlik radiusta da úyreniw jumısları alıp barıladı.

Házirgi waqıtta quslar, jarǵanatlar, jerbawırlawshılar hám basqa haywanlardıń sanı jáne túrleri úyrenilmekte. Sonday-aq, ósip atırǵan ósimlikler hám jer astı suwları da baqlap barıladı.

Qaraqalpaqstan xabar agentligi.