baspaǵa shıǵarıw
Birlesken Milletler Shólkeminiń Rawajlanıw
baǵdarlaması hám Ózbekstan Respublikası Investiciyalar hám sırtqı sawda
ministrligi tárepinen Qaraqalpaqstannıń bes rayonında BMSh nıń Aralboyı regionı
ushın insan qáwipsizligi boyınsha kóp sheriklik trast fondı hám Yaponiya
húkimetiniń qarjılay járdeminde ámelge asırılıp atırǵan joybarlar menen tanısıw
maqsetinde mámleketlik hám jeke menshik ǵalaba xabar quralları wákilleri ushın
media-tur shólkemlestirildi.
Ótkerilgen
media-tur dawamında qatnasıwshılar Shımbay rayonı «Mayjap» APJda jaylasqan
«Qoshqar jıqqın» awılı aymaǵında suw tazalaw qurılmasındaǵı alıp barılǵan qayta
qurıw jumısları menen jaqınnan tanıstı.
Aytıp ótiw orınlı, bul jerde tezligi saatına 8 kubometr bolǵan suw tazalaw úskenesi hám suw támiynatı tarmaǵı ornatılǵan bolıp, puqaralardı taza ishimlik suwı menen támiynlewde áhmiyeti úlken esaplanadı.Sonday-aq, rayondaǵı «Jańa mákan» elatlı punkti «Gújimli» mákan puqaralar jıyınında da 10600 metr uzınlıqtaǵı suw qubırları jańadan tartılǵan bolıp, nátiyjede 1200 den aslam jergilikli turǵınlar taza ishimlik suwı menen támiyinlewge erisildi.
BMSh nıń
Rawajlanıw baǵdarlamasınıń Qaraqalpaqstannıń shetki rayonları hám awıllarında
jańa ekologiyalıq innovaciya hám texnologiyalar zonasın shólkemlestiriw
boyınsha Aralboyı regionın rawajlandırıwǵa qaratılǵan is-ilajlardı bunnan bılay
da dawam ettiriliwi belgilengen.
Ótkerilgen media-turda ǵalaba xabar quralları
wákilleri rayon xalqınıń turmıs abadanlıǵın támiynlewde áhmiyetli bolǵan jańa
obektler boyınsha keń túsinikke iye boldı.