baspaǵa shıǵarıw
Qalamızdıń ekologiyalıq jaǵdayın jaqsılaw, jaslar arasında
ana-tábiyatqa degen súyispenshilikti arttırıw, ekologiyalıq mádeniyattı
jetilistiriw hám «Jasıl mákan ulıwma milliy háreketi sheńberindegi ilajlardı
elede ǵalabalastırıw maqsetinde Nókis qalasındaǵı Jiydeli Baysın elatında
Qaraqalpaqstan Respublikası Ministrler Keńesi baslaması menen «Jasıl mákan»
jaslar joybarı akciyası shólkemlestirildi.
Ótkerilgen akciyanı Qaraqalpaqstan Respublikası Ministrler
Keńesi Baslıǵı Qaxraman Saryiev
ashıp berdi hám birinshi terek nálin otırǵızdı.
Akciyada sonday-aq, barlıq mákeme-kárxanalar, ministrlikler,
tiyisli shólkemlerden wákiller, nuranıy-aqsaqallar, joqarı oqıw orınları hám
kewilli jaslardan dúzilgen otryadları qatnastı.
Erte tańnan baslanǵan ilaj sheńberinde 5000 ǵa shamalas adam
«Jaslar baǵı»na jaqsı niyetler menen dekorativ hám sayamanlı terekler, sonday-aq, hár qıylı miywe nállerin
otırǵızdı. Ulıwma maydanı 6 gektardan aslam atızda búgin jumıs qızǵın túrde
alıp barıldı.
Joqarı dárejede shólkemleskenlik penen ótkerilgen akciya
sheńberinde jaqsı istiń basında dástúrxan jayılıp, qatnasıwshılarǵa kóterińki
keypiyat úlesiw maqsetinde koncert baǵdarlaması shólkemlestirildi.
Aytıp ótiw orınlı, «Jasıl mákan» ulıwma milliy akciyası bul
jaslar baslamalarınıń biri bolıp, jaqında Ózbekstan Respublikası Prezidenti
Shavkat Mirziyoev baslaması menen járiyalanǵan «Jasıl mákan» ulıwma milliy
joybarı boyınsha usı jıldıń 10-dekabr kúnine shekem ótkerilip atırǵan
«áhmiyetli 40 kúnlik» ilajlarınıń dawamı bolıp esaplanadı hám bunday ilajlar
bunnan bılay da keń túrde dawam ettiriledi.
Ótkerilgen akciya juwmaǵında «Jasıl mákan» akciyasına belsendi qatnasqan barlıq mákeme-shólkemler, mámleketlik xám húkimetlik uyımlar, joqarı oqıw orınları wákillerine Qaraqalpaqstan Respublikası Ministrler Keńesiniń minnetdarshılıq xatları hám estelik sawǵaları tapsırıldı.
