baspaǵa shıǵarıw
Usı jıl 29-iyul kúni Nókis qalasında «Jumısqa márhamat» mono orayınıń ashılıw saltanatı bolıp ótti.
Onda Qaraqalpaqstan Respublikası Ministrler Keńesiniń Baslıǵı Q.Sariev, Ózbekstan Respublikası Bántlik hám miynet qatnasıqları ministri N.Husanov, Ózbekstan Respublikası Oliy Majlisi Senatınıń Aralboyı regionın rawajlandırıw máseleleri komitetiniń baslıǵı B.Alixanov hám basqalar shıǵıp sóylep, mámleketimizde miynet bazarınıń nátiyjeli mexanizmlerin engiziw, kámbaǵal hám jumıssız puqaralardı zamanagóy kásip-óner hám isbilermenlik kónikpelerine oqıtıw, sol tiykarda olardı turaqlı dáramat keltiretuǵın miynet hám isbilermenlik jumısına tartıw arqalı bántligin támiyinlew baǵdarında ámelge asırılıp atırǵan keń kólemli jumıslarǵa toqtap ótti.
Ózbekstan Respublikası Prezidentiniń 2020-jıl 11-avgusttaǵı «Kámbaǵal hám jumıssız puqaralardı isbilermenlikke tartıw, olardıń miynet belsendiligin arttırıw hám kásip-ónerge oqıtıwǵa qaratılǵan jáne xalıqtıń bántligin támiyinlewge baylanıslı qosımsha ilajlar haqqında»ǵı qararı tiykarında respublikamızda hám wálayatlarda «Jumısqa márhamat» monoorayları shólkemlestirilmekte.
Nókis qalasındaǵı burınǵı kommunal xojalıǵı hám xızmet kórsetiw kásip-óner kolledji imaratınıń bir bólegi qayta rekonstrukciyalanıp, «Jumısqa márhamat» monoorayı paydalanıwǵa tapsırıldı. Bul jerde «Nókis agrosanaat qurılıs montaj» juwapkershiligi sheklengen jámiyetiniń qurılısshıları tárepinen 10,5 milliard sumlıq rekonstrukciya jumısları ámelge asırıldı. Oraydıń materiallıq-texnikalıq bazasın bekkemlew maqsetinde Jáhán banki qarjıları esabınan 1,5 milliard sum ajıratılıp, zamanagóy ásbap-úskeneler alıp kelindi.
Jańadan paydalanıwǵa tapsırılǵan «Jumısqa márhamat» monoorayında xalıqqa 4 baǵdar boyınsha 19 kásip-óner hám 3 shet tili úyretiledi. Atap aytqanda, servis hám xızmet kórsetiw tarawı boyınsha neyl-stilist, kosmetolog, hayal-qızlar shashtárezi hám vizajist, erler shashtárezi, tigiwshi, keytring xızmeti (aspaz, kulinariya hám servis xızmeti), massajist (balalar ushın), batler-oficiant, texnikalıq taraw boyınsha santexnik, elektrik, turmıslıq úy-ruwzıgershilik elektrotexnika buyımların ońlaw ustası, kepserlewshiler, júk kóteriwshi kran operatorı, awıl xojalıǵı tarawı boyınsha ıssıxana, gidroponika, ulıwma qurılıs tarawı boyınsha gipsokartondı qayta islew, gerbish óriwshi, sıbawshı hám boyawshı qánigelikleri, sonday-aq, rus, ingliz hám koreys tilleri úyretiledi.
Tıńlawshılar ushın qısqa múddetli oqıw krusları 1 aydan 4 ayǵa shekem dawam etedi. Hár bir kurs ushın belgilengen oqıw múddeti hám saatlar kólemi tiyisli taraw qánigeleri, jumıs beriwshiler, «World Skills» xalıqaralıq standartı, miynet bazarındaǵı talap, usınıs hám zárúrliklerdi esapqa alǵan halda islep shıǵılǵan. Basqa bilimlendiriw sistemalarınan ózgeщeligi bul jerde oqıw sabaqları 30 procent teoriyalıq, 70 procent ámeliy tárizde alıp barıladı. Oray pitkeriwshileriniń kásiplik sheberligi «World Skills» xalıqaralıq standartı tiykarında bahalanıp, onnan tabıslı ótkenlerge elimizde hám sırt ellerde tán alınǵan kásiplik mamanlıq sertifikatı (Skills pasportı) beriledi.
Búgingi kúni orayda 180 puqara kásip óner sırların úyrenbekte.
Ilaj qatnasıwshıları orayda tıńlawshılar ushın jaratılǵan sharayatlar menen tanıstı.
D.ABIBULLAEV,
Qaraqalpaqstan xabar agentliginiń sholıwshısı.
M.HÁBIYBULLAEV tıń túsirgen súwretleri.