Qaraqalpaqstan Respublikası Ministrler Keńesi

Usı jılı Tokio qalasında (Yaponiya) bolıp ótetuǵın jazǵı Olimpiada hám Paralimpiada oyınlarında Ózbekstan sportshılarınıń hár tárepleme tayarlıǵı hám tabıslı qatnasıwın támiyinlew, olarda altın, gúmis hám bronza medalların qolǵa kirgizgen sportshılardı materiallıq qollap-quwatlaw, sonday-aq, elimizde Olimpiada hám Paralimpiada háreketlerin jáne de rawajlandırıw maqsetinde:

2021-jılı Tokio qalasında (Yaponiya) bolıp ótetuǵın XXXII jazǵı Olimpiada hám XVI Paralimpiada oyınlarında (keyingi orınlarda – Olimpiada hám Paralimpiada oyınları) qatnasatuǵın Ózbekstan sport delegaciyasınıń quramı 1-qosımshaǵa muwapıq tastıyıqlansın.

Turizm hám sport ministrligi (A.Abduxakimov), Ózbekstan Milliy olimpiada komiteti (R.Shaabduraxmanov), Ózbekstan Milliy paralimpiada komiteti (M.Tashxodjaev)ne tómendegi wazıypalardı orınlaw júklensin:

Olimpiada hám Paralimpiada oyınlarında qatnasıw huqıqın beretuǵın licenziyaǵa erisken sportshılar ushın oqıw-shınıǵıw jıyınlarınıń juwmaqlawshı basqıshın nátiyjeli hám sapalı shólkemlestiriw;

Olimpiada hám Paralimpiada oyınlarında Ózbekstan sport delegaciyası aǵzalarınıń qatnasıwı ushın olardı sport quralları (sonıń  ishinde, arnawlı sport quralları), rásmiy kiyim hám sport ekipirovkası menen támiyinlew;

Mádeniyat ministrligi, Sırtqı isler ministrligi, Tashkent qalası hákimligi menen birgelikte Olimpiada hám Paralimpiada oyınlarında Ózbekstan sport delegaciyası aǵzalarınıń qatnasıwın támiyinlew ushın olardı shıǵarıp salıw, jaylastırıw, saltanatlı túrde kútip alıw ilajların shólkemlestiriw.

2021-jılı Tokio qalasında (Yaponiya) bolıp ótetuǵın XXXII jazǵı Olimpiada hám XVI Paralimpiada oyınlarına tayarlıq kóriw hám qatnasıw qárejetleriniń smetası 2-qosımshaǵa muwapıq tastıyıqlansın.

2021-jıl 24-iyun jaǵdayına Olimpiada hám Paralimpiada oyınlarında qatnasıw huqıqın beriwshi jámi 101 licenziya qolǵa kirgizilgeni;

Olimpiada hám Paralimpiada oyınları baslanǵanǵa shekem olimpiada sport túrleri boyınsha qosımsha kvotalar ajıratıw, paralimpiada sport túrleri (paradzyudo, parapauerlifting, parajúziw, paraakademiyalıq eskek esiw hám basqalar) boyınsha qosımsha 17 licenziyanı qolǵa kirgiziw kútilip atırǵanı maǵlıwmat ushın qabıl etilsin.

Olimpiada hám Paralimpiada oyınlarına Ózbekstan sportshıların sapalı tayarlawdı shólkemlestiriw boyınsha Respublikalıq komissiya (A.Oripov)ǵa Olimpiada hám Paralimpiada oyınları baslanǵanǵa shekem olarda qatnasıw huqıqın beriwshi qosımsha licenziyalar sanınan kelip shıǵıp usı qarar menen tastıyıqlanıp atırǵan 1- hám 2-qosımshalarǵa tiyisli túrde komissiya protokolı menen ózgerisler hám qosımshalar kirgiziw huqıqı berilsin.

Respublikalıq komissiya Paralimpiada oyınlarına tayarlanıw hám qatnasıwdıń anıq muǵdarın belgilesin.

a) Olimpiada hám Paralimpiada oyınlarında jeńimpaz hám sıylı orın iyeleri bolǵan Ózbekstan sportshıları tómendegi muǵdarda bir mártelik aqshalay sıylıq penen xoshametlenetuǵını:

altın medal ushın – 200 000 AQSh dolları;

gúmis medal ushın – 100 000 AQSh dolları;

bronza medal ushın – 50 000 AQSh dolları;

b) usı bántte názerde tutılǵan qárejetler Mámleketlik byudjettiń qarjıları esabınan qaplanatuǵını belgilep qoyılsın.

Milliy antidoping agentligi (N.Tursunov) Olimpiada hám Paralimpiada oyınlarında:

Sportshılar tárepinen antidoping qaǵıydalarına qatań boysınıwı ústinen nátiyjeli antidoping qadaǵalawın ámelge asırsın;

Ózbekstan sport delegaciyasın antidoping temalarına baylanıslı tiyisli oqıw-málimleme materialları hám hár qıylı kórgizbeli maǵlıwmatlar menen támiyinlesin.

Sırtqı isler ministrligi (A.Kamilov) Ózbekstan sport delegaciyasınıń Narita xalıqaralıq aeroportında immigraciya qadaǵlawınan ótiwine járdemlessin.

Ishki isler ministrligi (P.Bobojonov):

Ózbekstan sport delegaciyası aǵzalarınıń Olimpiada hám Paralimpiada oyınlarında qatnasıwı ushın Ózbekstan Respublikası puqarasınıń sırt elge shıǵıw biometrikalıq pasportı óz waqtında rásmiylestiriliwin támiyinlesin;

shıǵarıp salıw hám kútip alıw ilajlarında qáwipsizlikti támiyinlew hám jámiyetlik tártipti saqlaw, sonday-aq, Ózbekstan sport delegaciyası transport qurallarınıń Tashkent qalası aymaǵında shıǵarıp salıwın shólkemlestiriw boyınsha zárúr shólkemlestiriw ilajların kórsin.

Transport ministrligi (I.Maxkamov):

Turizm hám sport ministrligi, Ózbekstan Milliy olimpiada komiteti jáne Ózbekstan Milliy paralimpiada komitetiniń talaplarına tiykarlanıp usı jıldıń iyul-sentyabr aylarında Tokio qalasına reysler shólkemlestiriliwin, sonday-aq, Ózbekstan sport delegaciyası ushın aviabiletler bron etiliwin;

«Tashkent-Tokio-Tashkent» jónelisi boyınsha charter reysleriniń shólkemlestiriliwin hám ámelge asırılıwın;

Ózbekstan sport deleaciyası aǵzalarına tiyisli bolǵan sport quralları hám úskeneleriniń Islam Kárimov atındaǵı «Tashkent» xalıqaralıq aeroportı arqalı biypul ótkeriliwin;

Islam Kárimov atındaǵı «Tashkent» xalıqaralıq aeroportınıń ulıwma zalında «jasıl koridor» shólkemlestiriw hám usı koridor arqalı Ózbekstan sport deleaciyası aǵzaların shıǵarıp salıwdı támiyinlesin.

Mámleketlik bajıxana komiteti (M.Azimov) Ózbekstan sport deleaciyası hám olardıń qol júkleri (sport awqatları, sport quralları, úskeneler, medicinalıq ásbap-úskeneler hám preparatlar jáne basqalar) bajıxana qadaǵalawınan ótkeriliwin hám rásmiylestiriw jumıslarınıń jedellik penen ámelge asırılıwın támiyinlesin.

Ózbekstan Milliy olmpiada komiteti (R.Shaabduraxmanov) hám Ózbekstan Milliy paralimpiada komiteti (M.Tashxodjaev) «Dári-Dármaq» AK (U.Salixbaeva), Densawlıqtı saqlaw ministrligi (A.Xadjibaev) menen birgelikte Ózbekstan sport deleaciyasın zárúr bolǵan úskeneler, medicinalıq ásbap-úskeneler hám preparatlar menen támiyinlesin.

Ózbekstan milliy teleradiokompaniyası (A.Xadjaev), Ózbekstan Milliy málimleme agentligi (A.Kwchimov) sportshılardıń Olimpiada aldı oqıw-shınıǵıw jıyınları, Olimpiada hám Paralimpiada oyınlarında qatnasıwı haqqında qısqa metrajlı videorolikler jáne arnawlı kórsetiwler tayarlanıwın hám ǵalaba xabar qurallarında keńnen jarıtılıwın támiyinlesin.

Turizm hám sport ministrligi (A.Abduxakimov) Ózbekstan Milliy olimpiada komiteti (R.Shaabduraxmanov) hám Ózbekstan Milliy paralimpiada komiteti (M.Tashxodjaev) menen birgelikte bes kún múddette Olimpiada hám Paralimpiada oyınları dawamında shólkemlestiriw jumısların jedellik penen sheshiw hám muwapıqlastırıw maqsetinde milliy shtablardı shólkemlestirsin hám jumısın jolǵa qoysın.

Ózbekstan Milliy olmpiada komitetine jáne Ózbekstan Milliy paralimpiada komitetine Olimpiada hám Paralimpiada oyınlarına tayarlıq kóriw ushın sport quralları, úskeneler, delegaciyanıń rásmiy kiyimleri (ekipirovkası), sport medicinası úskeneleri, medicinalıq-biologiyalıq preparatlar satıp alıw boyınsha sırt el hám jergilikli islep shıǵarıwshılar menen shártnamalardı, sonday-aq, oqıw-shınıǵıw jıyınları bolıp ótetuǵın sport bazaları, jataqxana, sport zalları hám sport úskeneleriniń ijaraları haqqında jáne awqatlanıwdı shólkemlestiriw boyınsha shártnamalardı, burınǵısınan ózgeshe tárizde, mámleketlik satıp alıwlar boyınsha arnawlı málimleme portalında tiyisli daǵaza jaylastırmastan hám elektron sawdalarsız, tendersiz, tikkeley rásmiylestiriw hám tólemlerdi ámelge asırıwǵa ruqsat berilsin.

Bas ministrdiń orınbasarı – turizm hám sport ministri A.Abduxakimov, Ózbekstan Milliy olimpiada komiteti, Ózbekstan Milliy paralimpiada komiteti, Qarjı ministrligi, Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri, basqa da mápdar ministrlikler hám uyımlar menen birgelikte jáne sport federaciyaları (associaciyaları)n tartqan halda tómendegi normativlik-huqıqıy hújjetlerdiń joybarların kirgizsin:

a) bir ay múddette – olimpiada rezervleri kolledjleriniń jumısın túp-tiykarınan jetilistiriw, bul boyınsha kolledjlerdegi sport bilimlendiriw baǵdarlarınıń olimpiada sport túrleri menen izbe-iz baylanıslılıǵın támiyinlew, aymaqlarda qábiletli jaslardı anıqlaw, tańlaw hám saylap alıw (selekciya)dıń jańa sistemasın engiziw, trener hám qánigelerdi materiallıq xoshametlew sistemasın jaqsılaw boyınsha;

b) 2021-jıl 1-dekabrge shekem:

komandalıq sport túrleri (basketbol, gandbol, shóp ústinde xokkey, voleybol hám basqalar)n rawajlandırıw hám ǵalaba en jaydırıw, bul boyınsha talantlı jaslardı anıqlaw, tańlaw hám saylap alıw (selekciya) sistemasın engiziw, rayon (qala)lıq, wálayatlıq, respublikalıq hám xalıqaralıq jarıslar hám turnirlerdi shólkemlestiriw jáne ótkeriw, trener hám qánigelerdi qayta tayarlaw hám mamanlıǵın arttırıw boyınsha;

suw sportı túrleri (suw polosı, júziw, sinxron júziw, suwǵa sekiriw hám basqalar)n rawajlandırıw, suw sportı sarayların qurıw, jeke menshik suw sportı mekteplerin shólkemlestiriwdi mámleket tárepinen qollap-quwatlaw boyınsha.

Usı qarardıń orınlanıwın nátiyjeli shólkemlestiriwge jeke juwapker etip Bas ministrdiń orınbasarı – turizm hám sport ministri A.A.Abduxakimov, Ózbekstan Milliy olimpiada komitetiniń baslıǵı R.M.Shaabduraxmanov hám Ózbekstan Milliy paralimpiada komitetiniń baslıǵı M.M.Tashxodjaev belgilensin.

Qarardıń orınlanıwın dodalap barıw, orınlaw ushın juwapker uyımlardıń jumısın muwapıqlastırıw hám qadaǵalaw Ózbekstan Respublikası Bas ministri A.N.Aripov jáne Ózbekstan Respublikası Prezidentiniń keńesgóyi A.A.Abduvaxitovqa júklensin.

 

 Ózbekstan Respublikası

 Prezidenti                                     Sh.MIRZIYoEV

Tashkent qalası,

2021-jıl 25-iyun