baspaǵa shıǵarıw
Usı jıldıń 3-iyun kúni Ózbekstan Elektron ǵalaba xabar quralları milliy associaciyası, Ózbekstan Sırtqı isler ministrligi, Ekonomikalıq rawajlanıw hám kambaǵallıqtı qısqartıw ministrligi, Qaraqalpaqstan Respublikası Ministrler Keńesi menen birgelikte “Aralboyı regionı ekologiyalıq innovaciyalar hám texnologiyalar aymaǵına aylanadı” atamasında “Ashıq sáwbet” shólkemlestirildi.
Hámmemizge belgili 2021-jıldıń 18-may kúni Birlesken Milletler Shólkemi Bas Assambleyası 75-sessiyasınıń gezektegi jalpı májilisi bolıp ótti.
Kún tártibindegi birinshi másele sıpatında Ózbekstan tárepinen usınıs etilgen Aralboyı regionın ekologiyalıq innovaciyalar hám texnologiyalar aymaǵına aylandırıw haqqındaǵı rezolyuciya joybarı barlıq mámleketler tárepinen bir dawıstan maqullandı.
Rezolyuciya Aralboyı regionında bunnan bılay da tábiyattı tiklew hám jaqsılaw, tábiiy resurslardı saqlaw hám xalıqtıń turmıs dárejesin arttırıw jolındaǵı ilimiy izleniwlerdi qollap-quwatlaydı.
Sonıda ayrıqsha atap ótiw kerek, Aralboyı Bas Assambleya tárepinen “Ekologiyalıq innovaciyalar hám texnologiyalar aymaǵı” sıyaqlı joqarı status berilgen dáslepki region boldı.
Bul rezolyuciyanıń mazmun-mánisin keng jámiyetshilikke tusindiriw maqsetinde Ministrler Keńesinde “Ashıq sáwbet” shólkemlestirildi. Oǵan ministrlikler menen shólkemeler, respublikamızdaǵı televidenie, radio baspasózden jurnalistler qatnastı. Áhmiyetlisi bul “Ashıq sáwbet” Italiya mámleketi menen onlayn videobaylanıs arqalı bolıp ótti. Sonday-aq, sırt elli ekspertler tikkeley Qaraqalpaqstanǵa kelip qatnastı.
BMSh Bas Assambleyası arnawlı rezolyuciyasınıń qabıl etiliwi ekologiyalıq taza, energiya hám suwdı únemlewshi texnologiyalardı islep shıǵarıw hám engiziw ushın investiciyalardı qaratıw, “Jasıl ekonomika” principlerin qollanıw, ekologiyalıq migraciya processleriniń aldın alıw, ekoturizmdi rawajlandırıw sıyaqlı kóplegen ilajlardı ámelge asırıw ushın zárúrli bolǵan sharayatlardı jaratıwǵa hám háreketlerdi birlestiriwge qaratılǵanlıǵı menen áhmiyetli.
QMU Qaraqalpaq filologiyası hám jurnalistika fakulteti, Málimleme xızmeti qánigeliginiń 1-kurs studentleri
Kudaybergenov Muxammed
Kalbaev Xumoyun