Qaraqalpaqstan Respublikası Ministrler Keńesi

Usı jıl 21-noyabr kúni Berdaq atındaǵı Qaraqalpaq mámleketlik akademiyalıq muzıkalı teatrında Ózbekstan hám Qaraqalpaqstanǵa xızmet kórsetken kórkem óner ǵayratkeri, Berdaq atındaǵı mámleketlik sıylıqtıń laureatı Qurbanbay Zaretdinovtıń «Xalıq ushın» operasınıń premerası bolıp ótti.

Premera aldınan Berdaq atındaǵı Qaraqalpaq mámleketlik akademiyalıq muzıkalı teatrınıń direktorı A.Nietullaev, Qaraqalpaqstan Respublikası Mádeniyat ministriniń orınbasarı J.Abdijamilov shıǵıp sóylep, jıynalǵanlardı jańa opera menen qutlıqladı.

Atap ótilgenindey, Prezidentimizdiń baslaması menen mádeniyat  hám kórkem óner tarawın rawajlandırıw hám qollap-quwatlawǵa ayrıqsha itibar qaratılmaqta. Mine usı imkaniyatlardan paydalanǵan teatr jámááti xalqımızdıń kewlinen shıǵatuǵın jańa shıǵarmalardı saxnalastırıp, tamashagóylerdiń názerine usınbaqta. Búgingi kúnge shekem teatrda birinshi qaraqalpaq operası «Ájiniyaz», onnan keyin «Tumaris» hám «Gúlayım» shıǵarmaları saxnalastırılǵan bolsa, xalqımızdıń ullı shayırı Berdaqtıń ómiri jáne dóretiwshiligine baǵıshlanǵan gezektegi «Xalıq ushın» operası tamashagóyler ushın ájayıp sawǵa boldı.

Shıǵarmadaǵı waqıya Berdaq shayırdıń úyindegi kórinis penen baslanadı. Shayır ómiriniń sońǵı jıllarında dóretken «Ernazar biy» poemasın shákirti Qulmurat shayırǵa oqıp beredi.

Bunnan keyin saxnada sol dáwirdegi xalqımızdıń awır turmısı, qazıwshılardıń qıyınshılıqları, adamlardıń súrginge jiberiliwi, qızlardıń zorlıq penen satıp jiberiliwi sıyaqlı kórinislerdi jıynalǵanlar ayrıqsha qızıǵıwshılıq penen tamasha etti.

Xalıqtıń turmısı qanshelli awır bolmasın, shayırdıń qosıqları olarǵa mádet beredi. Ásirese, shayır qosıqlarındaǵı «Xalıq ushın», «El ushın» degen qatarları sol dáwirdiń uranına aylanadı.

Operanıń muzıkalıq jaqtan basshısı hám dirijyorı Ózbekstan hám Qaraqalpaqstanǵa xızmet kórsetken kórkem óner ǵayratkeri, Berdaq atındaǵı mámleketlik sıylıqtıń laureatı Q.Zaretdinov, liberotto avtorı Qaraqalpaqstan xalıq shayırı K.Karimov, saxnalastırıwshı  rejissyor M.Úsenov, saxnalastırıwshı xudojnik T.Shardemetov, xormeysterlar A.Tolepova, Q.Kinjebaev, A.Muxammetsheripova, baletmeyster Ózbekstan xalıq artisti A.Sharipov hám basqalardıń miynetin ayrıqsha atap ótiw kerek.

Tiykarǵı rollerdi  Saparbay Shermanov (Berdaq), Abat Ashirov (Qulmurat shayır), Ózbekstan hám Qaraqalpaqstanǵa xızmet kórsetken artist Eliza Aytniyazova (Húrliman), Ózbekstan hám Qaraqalpaqstanǵa xızmet kórsetken artist Roza Qutekeeva (Biybitxan), Farit Uzaqbergenov (Qulman bolıs), Gúlbanu Reypnazarova (Periyzat) hám basqada artistler sheberlik penen atqarıp shıqtı.

 

D.ABIBULLAEV,

Qaraqalpaqstan xabar agentliginiń sholıwshısı.

M.HÁBIYBULLAEV tıń túsirgen súwretleri