Qaraqalpaqstan Respublikası Ministrler Keńesi

Chirchiq qalasındag‘ı Ózbekstan mámleketlik dene tárbiyası hám sport universiteti sport manejinde kadetler arasında erkin gúres boyınsha Ózbekstan chempionatı bolıp ótti.

Uzaq dawam etken karantinnen soń birinshi márte ótkerilgen jarıs 2004-2005-jıllarda tuwılg‘an jas óspirimler arasında bolıp ótip, qızg‘ın bellesiwler nátiyjelerine muwapıq jeńimpazlar hám sıylı orın iyeleri anıqlandı.

Ózbekstan birinshiliginde jas palwanlar 10 salmaq kategoriyası boyınsha chempionlıq ushın óz ara bellesti.

Chempionatta Qaraqalpaqstan Respublikası atınan qatnasqan jas óspirimler jaqsı nátiyjelerdi qolg‘a kirgizdi.

Jerleslerimizden 55 kg salmaq kategoriyasında J.Ismayыlov, 65 kg salmaqta S.Jumabayev hám 110 kg salmaqta  H.Qurbanov 3-orındı iyelep, bronza medalların jeńip alg‘an bolsa, 110 kg salmaq kategoriyasında final bellesiwine shekem barlıq qarsılaslarınan ústin kelgen L.Mádiyarov 2-orındı alıp, gúmis medal menen sıylıqlandı.

Qaraqalpaqstanlı sportshılardan eń joqarı nátiyje 92 kg salmaq kategoriyasında qolg‘a kirgizildi. Jerlesimiz Aynazar Bazarbayev usı salmaqta barlıq qarsılasların jeńip, 1-orındı iyeledi hám Ózbekstan chempionı boldı.

Qaraqalpaqstan xabar agentligi